Түркістан облысында ауыл шаруашылығы алқаптарын зиянкестерден қорғау және өңірдің фитосанитариялық қауіпсіздігін қамтамасыз ету мақсатында үйірлі шегірткеге қарсы кешенді күрес жұмыстары күшейтілді. Бұл бағыттағы шаралар облыс әкімдігі мен салалық мамандардың тұрақты бақылауында жүзеге асырылып, өңірде арнайы штабтық жүйе арқылы үйлестірілуде.
Облыс әкімінің орынбасары Нұрбол Тұрашбековтің төрағалығымен өткен кезекті штаб отырысында қазіргі қалыптасқан фитосанитариялық ахуал жан-жақты сараланды. Жиын барысында Болжам орталығы ұсынған деректер негізінде өңір аумағындағы тексеру, анықтау және өңдеу жұмыстарының нәтижелері баяндалды.
Мәліметтерге сәйкес, бүгінгі күнге дейін облыс бойынша 53,3 мың гектар аумақ зерттелген. Жүргізілген мониторинг нәтижесінде бірқатар аудандарда шегіртке дернәсілдерінің экономикалық зиянды шектен асқаны анықталған. Атап айтқанда, Келес ауданында – 7442 гектар, Арыс қаласы аумағында – 1942 гектар, Сарыағаш ауданында – 3122 гектар, Қазығұрт ауданында – 80 гектар жер зиянкестер ошағы ретінде тіркелген.
Сонымен қатар шегіртке дернәсілдерінің белсенді таралу ошақтары да нақты белгіленіп отыр. Сарыағаш ауданында 17 секторда, Арыс қаласында 12 секторда, Келес ауданында 19 секторда зиянкес белсенділігі анықталған. Бұл деректер бойынша жедел өңдеу және бақылау жұмыстары ұйымдастырылуда.
Күрес шараларының тиімділігін арттыру мақсатында барлық ресурстар жұмылдырылған. Қазіргі таңда облыста 228 техника химиялық өңдеу жұмыстарына тартылса, 18 көлік су жеткізу және қосымша қамтамасыз ету қызметін атқаруда. Сонымен қатар анықтау топтары мен мониторинг жүргізетін мамандардың жұмысы күшейтіліп, әрбір секторда нақты есеп пен бақылау жүргізілуде. Химиялық өңдеу жүргізілген аумақтарда дәрілердің биологиялық тиімділігі тұрақты түрде тексеріліп, нәтижелері штаб отырыстарында қаралып отырады.
Жиында облыс әкімінің орынбасары Нұрбол Тұрашбеков жұмыстардың сапалы әрі уақытылы орындалуының маңыздылығын ерекше атап өтті. Ол ең алдымен қауіпсіздік талаптарын қатаң сақтауды, адам денсаулығына және қоршаған ортаға зиян келтірмеуді басты назарда ұстау қажеттігін ескертті.
Сонымен бірге жауапты мекемелерге бірқатар нақты тапсырмалар берілді. Атап айтқанда, 21, 22, 31, 32, 33-секторларда анықтаушы мамандардың санын көбейту, мониторинг жұмыстарын күшейту және дер кезінде әрекет ету жүйесін жетілдіру міндеттелді. Мердігер ұйымдарға қажетті техникаларды толық көлемде жеткізу және үздіксіз жұмыс істеуін қамтамасыз ету жүктелді.
– Шаруалармен байланыс тұрақты болуы керек. Тұрғындар зиянкес ошақтары анықталған жағдайда қайда және қалай хабарласу керектігін нақты білуі тиіс. Бұл жұмыста ең бастысы – жедел әрекет, үйлесімділік және жауапкершілік, – деді Нұрбол Тұрашбеков.
Бүгінде шегірткеге қарсы жұмыстарды жүйелі үйлестіру мақсатында Келес ауданы мен Арыс қаласында арнайы штабтар құрылып, тәулік бойы жұмыс істеуде. Мамандар жағдайды тұрақты бақылауда ұстап, әрбір өзгерісті жедел тіркеп отырады.
Сонымен қатар жергілікті тұрғындарға зиянкестер ошақтарын байқаған жағдайда бірден жергілікті әкімдікке немесе жауапты қызметтерге хабар беру қажеттігі түсіндірілуде. Бұл шаралар шегірткенің кең таралуының алдын алуға және ауыл шаруашылығы жерлерін қорғауға мүмкіндік береді.
Жалпы алғанда, Түркістан облысында шегіртке зиянкестеріне қарсы күрес жүйелі түрде ұйымдастырылып, барлық қажетті техника мен адам ресурстары жұмылдырылған. Атқарылып жатқан кешенді жұмыстар өңірдің ауыл шаруашылығы қауіпсіздігін қамтамасыз етуге, егін алқаптарын сақтауға және өнімділікті тұрақтандыруға бағытталған маңызды шара болып отыр.