Түркістан облысы соңғы жылдары экологиялық тұрақтылықты қамтамасыз ету мен көгалдандыру жұмыстарын күшейту бағытында жаңа бастамаларды жүйелі түрде іске асырып келеді. Солардың бірі – әлемде «болашақ ағашы» ретінде танылып отырған павлонияны өсіру жобасы. Бұл бастама өңірдің жасыл қорын арттырумен қатар, экологиялық ахуалды жақсартуға және агроөнеркәсіптік әлеуетті кеңейтуге бағытталған маңызды қадамдардың бірі саналады.
Бүгінде павлония ағашын отырғызу жұмыстары облыстың бірқатар аудандарында қарқын алған. Атап айтқанда, Жетісай ауданы, Келес ауданы және Сарыағаш ауданы аумақтарында бұл бағыттағы жұмыстар жүйелі түрде жүргізілуде. Сонымен қатар павлония көшеттері Түркістан қаласының кіреберіс аймақтарында да отырғызылып, бүгінде жайқалып өсіп тұр. Жалпы өңір бойынша 60 мыңнан астам түп павлония егілген, ал қамтылған алқап көлемі ондаған гектарға жеткен. Мамандар бұл көрсеткіш алдағы уақытта бірнеше есеге артады деп болжап отыр.
Павлония – биологиялық ерекшеліктері жағынан ерекше ағаш түрі. Ол әлемдегі ең жылдам өсетін өсімдіктердің бірі болып саналады. Қолайлы климаттық жағдайда жылына бірнеше метрге дейін өсіп, 20–25 метр биіктікке жетеді. Бұл қасиеті оны көгалдандыру мен орман шаруашылығы үшін өте тиімді етеді. Сонымен қатар павлония көктем мен жаз айларында ұзақ уақыт гүлдеп, қоршаған ортаны көркейтіп қана қоймай, атмосферадағы көмірқышқыл газын белсенді түрде сіңіріп, ауаны тазартуға үлес қосады. Осы тұрғыдан алғанда, бұл ағаш өңірдегі экологиялық тепе-теңдікті сақтауда маңызды рөл атқара алады.
Павлонияның тағы бір ерекшелігі – оның әмбебап экономикалық құндылығында. Ағаштың сүрегі өте жеңіл әрі берік болғандықтан, ол жиһаз өндірісінде, құрылыс саласында, қайық жасау, шаңғы өндірісі және музыкалық аспаптар дайындауда кеңінен қолданылады. Сондықтан бұл дақылды өсіру тек экологиялық жоба ғана емес, болашақта табыс әкелетін агробизнес бағыты ретінде де қарастырылып отыр.
Сала мамандарының пікірінше, Түркістан өңірінің табиғи-климаттық жағдайы павлония өсіруге толықтай қолайлы. Жазы ұзақ әрі ыстық, қысы жұмсақ келетін оңтүстік климат бұл ағаштың тез өсіп, жақсы бейімделуіне мүмкіндік береді. Осыған байланысты павлония алқаптарын кеңейту арқылы жаңа жұмыс орындарын ашу, өңірдің жасыл экономикасын дамыту және экспортқа бағытталған өнім өндіру мүмкіндігі де арта түспек.
Жалпы алғанда, павлония өсіру жобасы Түркістан облысы үшін стратегиялық маңызы бар бастамалардың біріне айналып отыр. Бұл жоба экологиялық ахуалды жақсартумен қатар, экономиканың жаңа бағытын қалыптастыруға, табиғи ресурстарды тиімді пайдалануға және өңірдің инвестициялық тартымдылығын арттыруға ықпал етеді. Алдағы жылдары бұл бастама кеңейіп, Түркістан өңірін еліміздегі жасыл даму орталықтарының біріне айналдыруға негіз болары сөзсіз.