Түркістан облысында 2025–2026 жылғы күзгі-қысқы жылыту маусымы сәтті аяқталып, өңір тұрғындарына табиғи газды үздіксіз әрі қауіпсіз жеткізу толық қамтамасыз етілді. Бұл нәтижеге облыс әкімдігі мен «QazaqGaz Aimaq» АҚ Түркістан өндірістік филиалының бірлесіп атқарған жүйелі әрі кешенді дайындық жұмыстарының арқасында қол жеткізілді.
Жылыту маусымына дайындық кезеңінде газбен жабдықтау жүйелерінің барлық инфрақұрылымы толық тексеріліп, жоспарлы жөндеу және техникалық қызмет көрсету жұмыстары уақтылы орындалды. Кәсіпорын нысандарында регламенттік талаптар қатаң сақталып, қауіпсіздік пен тұрақтылық басты назарға алынды. Атап айтқанда, 461 газ реттеу пункті (БГРП, ГРП), 97 125 шкафтық газ реттеу пункті (ШРП, ШГРП) және 56 электрхимиялық қорғау құрылғысына ағымдағы жөндеу жұмыстары жүргізіліп, барлық көрсеткіштер 100 пайыз орындалды.
Сонымен қатар газ тарату желілерінің сенімділігін арттыру және ықтимал апаттық жағдайлардың алдын алу мақсатында кең көлемді диагностикалық тексерулер ұйымдастырылды. «Пергам» ДЛС жылжымалы зертханасы арқылы жалпы ұзындығы 1 445 шақырымды құрайтын газ құбырлары тексеруден өтті. Бұл шаралар желілердегі жасырын ақауларды ерте анықтауға және оларды дер кезінде жоюға мүмкіндік берді.
Жылыту маусымы қарсаңында және оның барысында профилактикалық жұмыстар кешені жүйелі түрде жүргізілді. Атап айтқанда, 23 сүзгі тазартылып, 1 154 сүзгі элементі жаңартылды. Сонымен қатар газ құбырларының қауіпсіздігін арттыру мақсатында 86 аркалық өткел қайта жаңғыртылып, олардың бір бөлігі жер астына көшірілді немесе биіктігі көтерілді. Бұл шаралар газ құбырларының сыртқы әсерлерден қорғалуын күшейтті.
Қауіпсіздік талаптарын арттыру бағытында қосымша кешенді жұмыстар да атқарылды. Аркалық өткелдерге жарық шағылыстырғыш бояу жағу және биіктік шектеу белгілерін орнату бойынша 271 іс-шара жүзеге асырылды. Сонымен қатар төмен қысымды газ құбырларын тұрақтандыру мақсатында 23 сақиналау жұмысы жүргізілді. Бұдан бөлек, жүйенің өткізу қабілетін арттыру үшін 10 жаңа шкафтық газ реттеу пункті орнатылып, 9 газ құбырының диаметрі ұлғайтылды. Бұл шаралар газ қысымының тұрақтылығын сақтауға және тұтынушыларды үздіксіз қамтамасыз етуге мүмкіндік берді.
Авариялық-диспетчерлік қызметтің жұмысы жылыту маусымы кезінде ерекше бақылауда болды. 2025 жылдың 1 қазанынан 2026 жылдың сәуір айына дейін тұрғындар тарапынан 7 266 өтініш қабылданды. Барлық өтініштер жедел түрде қаралып, белгіленген мерзімде толық орындалды. Бұл газбен жабдықтау жүйесінің тиімді жұмысын және қызмет сапасының жоғары деңгейде екенін көрсетті.
Сонымен қатар газдандыру деңгейін арттыру бағытында да ауқымды жұмыстар атқарылды. Аталған кезеңде 70 елді мекенге табиғи газ жеткізіліп, 23 711 жаңа тұтынушы көгілдір отынға қосылды. Бұл өңір тұрғындарының тұрмыс сапасын арттыруға, әлеуметтік инфрақұрылымды жақсартуға және экологиялық жағдайды тұрақтандыруға оң әсерін тигізді.
Газдандыру жұмыстарының кеңеюі ауылдық елді мекендерде көмір мен басқа да отын түрлеріне тәуелділікті азайтып, тұрғындардың өмір сүру деңгейін жақсартуға мүмкіндік берді. Сонымен қатар табиғи газдың қолжетімділігі өңірдегі кәсіпкерлік пен шағын бизнестің дамуына да оң ықпал етуде.
Жалпы алғанда, қабылданған кешенді шаралардың нәтижесінде Түркістан облысында 2025–2026 жылғы жылыту маусымы тұрақты режимде өтіп, газбен жабдықтау жүйесінде ірі апаттық жағдайлар мен іркілістер тіркелген жоқ. Тұтынушыларға көгілдір отын үздіксіз әрі қауіпсіз түрде жеткізілді.
«QazaqGaz Aimaq» АҚ Түркістан өндірістік филиалы алдағы уақытта да газ тарату жүйелерін жаңғырту, инфрақұрылымды жетілдіру, цифрлық бақылау жүйелерін енгізу және қауіпсіздікті арттыру бағытындағы жұмыстарды жүйелі түрде жалғастыратынын мәлімдеді. Бұл өз кезегінде өңірдің энергетикалық тұрақтылығын нығайтуға және тұрғындардың өмір сапасын одан әрі жақсартуға мүмкіндік береді.