Түркістан облысында жастарға сапалы білім алуға жаңа мүмкіндіктер ұсыну және оларды еліміздің солтүстік өңірлеріндегі жоғары оқу орындарына тарту мақсатында «SERPIN WAY 2.0» атты ауқымды ақпараттық-насихаттау туры өтуде. Аталған жоба – тек кәсіби бағдар беру алаңы ғана емес, сонымен қатар еліміздегі еңбек ресурстарының теңгерімін сақтауға бағытталған маңызды мемлекеттік бастамалардың бірі.
Жоба 31 наурыз бен 23 сәуір аралығында ұйымдастырылып, Қазақстанның бірнеше өңірін қамтып отыр. Арнайы топ Петропавл қаласынан жолға шығып, оңтүстік аймақтарды аралауда. Делегация құрамында М. Қозыбаев атындағы Солтүстік Қазақстан университеті өкілдері, сондай-ақ Мансап орталығының мамандары бар. Олар мектеп бітіруші түлектермен, ата-аналармен және білім саласының өкілдерімен кездесіп, солтүстік өңірлерде білім алудың артықшылықтарын жан-жақты түсіндіруде.
Брифинг барысында университеттің маркетинг бөлімінің басшысы Олжас Мұхтар оқу орнының әлеуетіне кеңінен тоқталды. Оның айтуынша, Қозыбаев университеті – еліміздің солтүстік бөлігіндегі жетекші жоғары оқу орындарының бірі. Мұнда заманауи білім беру бағдарламалары енгізіліп, халықаралық серіктестік аясында бірқатар маңызды жобалар жүзеге асырылуда.
Солардың бірі – Аризона университеті мен бірлескен қос диплом бағдарламасы. Бұл бағдарлама аясында студенттер Қазақстанда оқи отырып, шетелдік жоғары оқу орнының дипломын да қатар ала алады. Мұндай мүмкіндік жастардың халықаралық деңгейде бәсекеге қабілетті маман болып қалыптасуына жол ашады. Сонымен қатар оқу орнында тәжірибеге негізделген оқыту жүйесі енгізілген, бұл түлектердің еңбек нарығында сұранысқа ие болуын қамтамасыз етеді.
«SERPIN WAY 2.0» жобасы аясында қатысушылар 23 күн ішінде еліміздің 7 өңірін аралайды. Атап айтқанда, Қарағанды, Жетісу, Алматы, Жамбыл, Қызылорда, Түркістан және Ақтөбе облыстарында кездесулер өткізу жоспарланған. Бұл кездесулер барысында оқушыларға оқу гранттары, жатақхана, әлеуметтік қолдау және болашақ жұмысқа орналасу мүмкіндіктері туралы толық ақпарат беріледі.
Статистикаға сүйенсек, өткен жылы М. Қозыбаев атындағы Солтүстік Қазақстан университеті-не оңтүстік өңірлерден 130-ға жуық студент қабылданған. Биыл бұл көрсеткішті арттыру мақсатында 14 қала мен 16 ауылдық елді мекен қамтылып отыр. Бұл – жобаның ауқымы кеңейіп, қызығушылықтың артып келе жатқанын көрсетеді.
Жоба аясында тек білім беру мәселесі ғана емес, көші-қон саясаты да кеңінен түсіндірілуде. Брифинг барысында «Тәуекел» үкіметтік емес ұйымы төрағасы Бурахан Дақанов сөз сөйлеп, солтүстік өңірлерге қоныс аударудың артықшылықтарына тоқталды. Оның айтуынша, 2026 жылдан бастап көші-қон бағдарламасы жаңа кезеңге өтеді. Ендігі жерде әр өңірдегі нақты маман тапшылығы ескеріліп, кадр даярлау жүйесі соған бейімделеді.
Сонымен қатар көші-қон процестерін цифрландыру, ашықтықты арттыру бағытында да нақты жұмыстар жүргізілуде. Солтүстік өңірлерде бос жұмыс орындарының көптігі, тұрғын үйдің қолжетімділігі және мемлекеттік қолдаудың жоғары деңгейде болуы – жастар үшін үлкен мүмкіндік. Бұл аймақтарда білім алып қана қоймай, тұрақты жұмысқа орналасып, өмір сүруге барлық жағдай жасалған.
Жалпы алғанда, «SERPIN WAY 2.0» жобасы – жастардың болашағына бағытталған стратегиялық бастама. Ол тек білім беру саласын дамытуға емес, сонымен қатар өңірлер арасындағы демографиялық және экономикалық теңгерімді сақтауға ықпал етеді. Түркістан облысында өтіп жатқан бұл тур көптеген жасқа жаңа мүмкіндіктер есігін ашып, олардың кәсіби және жеке дамуына жол көрсетуде.
Мұндай кездесулер жастардың көкжиегін кеңейтіп, өз болашағын саналы түрде жоспарлауына ықпал етеді. Солтүстік өңірлерге барып білім алу – тек оқу ғана емес, жаңа орта, жаңа мүмкіндік, жаңа өмір бастауға жасалған маңызды қадам. Сондықтан мамандар мектеп түлектерін ұсынылып отырған мүмкіндіктерді тиімді пайдалануға шақырады.