Түркістан облысында балалар мен жасөспірімдердің құқықтарын қорғау, олардың қауіпсіздігін қамтамасыз ету және кәмелетке толмағандар арасындағы құқықбұзушылықтардың алдын алу бағытындағы жұмыстарды жүйелеуге арналған кеңейтілген штаб отырысы өтті. Жиын өңірдегі білім беру ұйымдары, құқық қорғау органдары және әлеуметтік сала құрылымдарының бірлескен жұмысын күшейтуге бағытталды.
Мәжілісті облыс әкімінің орынбасары Ертай Алтаев ашып, жүргізіп отырды. Ол өз сөзінде Мемлекет басшысының балалардың құқықтарын қорғау мәселесіне ерекше мән беріп отырғанын атап өтіп, бұл бағыттағы жұмыстардың тек бір реттік шара емес, тұрақты әрі кешенді жүйе ретінде жүргізілуі қажет екенін жеткізді.
Жиын барысында облыстық білім басқармасы, полиция департаменті, кәмелетке толмағандар істері жөніндегі комиссия өкілдері және бірқатар жауапты құрылымдар атқарылып жатқан жұмыстар туралы есеп берді. Баяндамаларда мектептердегі профилактикалық шаралар, әлеуметтік жағдайы қиын отбасылармен жұмыс, құқықбұзушылықтардың алдын алу тетіктері және психологиялық қолдау жүйесі кеңінен қарастырылды.
Облыс әкімінің орынбасары Ертай Кенжебекұлы балалардың қауіпсіздігі – қоғамның тұрақтылығы мен болашағын айқындайтын ең маңызды факторлардың бірі екенін атап өтті. Ол отбасы тәрбиесі, мектептегі бақылау және қоғамдық ортаның ықпалы қатар жүруі тиіс екенін ерекше ескертті.
Ертай Алтаев өз сөзінде бірқатар нақты тапсырмалар берді:
«Балалар мен жасөспірімдер арасындағы құқықбұзушылықтардың алдын алу үшін тек статистикамен шектелмей, нақты себептерді анықтайтын талдау жұмыстары күшейтілуі тиіс. Әрбір тәуекел тобына жататын бала жеке бақылауда болуы қажет. Ата-аналармен жұмыс жүйелі түрде жүргізіліп, мектеп, полиция және әлеуметтік қызметтердің өзара байланысы нақты нәтижеге бағытталуы керек. Ауылдық елді мекендерде түсіндіру жұмыстары күшейтіліп, ақсақалдар кеңесі мен қоғамдық ұйымдар белсенді тартылуы тиіс», – деді ол.
Сонымен қатар жиында аудан және қала деңгейінде кәмелетке толмағандар істері жөніндегі комиссиялардың жұмысын жандандыру, профилактикалық топтардың қызметін күшейту және әрбір білім беру ұйымында нақты іс-қимыл жоспарын енгізу қажеттігі айтылды. Бұл бағытта тұрақты мониторинг жүргізу және деректерді цифрлық жүйеде біріктіру мәселесі де көтерілді.
Жиын барысында «тәуекел тобына» кіретін жасөспірімдермен жұмыс істеудің жаңа тәсілдері, соның ішінде психологиялық диагностика, әлеуметтік қолдау және ерте араласу механизмдерін күшейту қажеттігі атап өтілді. Мамандардың айтуынша, мұндай тәсіл құқықбұзушылықтың алдын алуда тиімді нәтиже береді.
Қазіргі таңда Түркістан облысында мыңнан астам мектепте 500 мыңнан астам оқушы білім алуда. Олардың психологиялық жағдайын бақылау және қолдау көрсету бағытында 1353 педагог-психолог қызмет атқарады. Бұл мамандар оқушылардың мінез-құлқын, оқу үлгерімін және әлеуметтік бейімделу деңгейін тұрақты бақылап отырады.
Өңірде психологиялық қолдау жүйесін жаңғырту жұмыстары да кезең-кезеңімен жүргізілуде. Ата-аналармен кері байланыс орнату, педагогтерді қайта даярлау және мектеп ішіндегі буллингтің алдын алу шаралары жүйеленіп келеді. Сонымен қатар білім беру ұйымдарында цифрлық мониторинг жүйелерін енгізу арқылы қауіп факторларын ерте анықтау тетіктері іске асырылуда.
Құқық қорғау органдары мектептермен бірлесе отырып профилактикалық рейдтер, түсіндіру кездесулері және «тәуекел топтарымен» жеке жұмыс жүргізуді күшейткен. Бұл шаралар жасөспірімдер арасындағы құқықбұзушылықтың алдын алуға бағытталған кешенді саясаттың бір бөлігі болып табылады.
Жиын қорытындысында облыс әкімінің орынбасары барлық жауапты құрылымдарға нақты міндеттер жүктеп, балалардың қауіпсіздігін қамтамасыз ету бағытындағы жұмыстардың нәтижелі орындалуын тұрақты бақылауда ұстау қажеттігін атап өтті.
Түркістан облысында кәмелетке толмағандардың құқықтарын қорғау және қауіпсіз орта қалыптастыру бағытындағы кешенді шаралар алдағы уақытта да жалғасып, әрбір бала үшін қолайлы әлеуметтік-психологиялық орта қалыптастыруға басымдық берілетін болады.