Түркістан облысының Түлкібас ауданы төрінде табиғаттың ерекше сыйы саналатын шұбайқызыл қызғалдағына арналған «Шұбайқызыл алауы-2026» экологиялық-мәдени фестивалі жоғары деңгейде өтіп, өз мәресіне жетті. Ұлы Жібек жолының бойында, Алатау мен Қаратаудың түйіскен тұсындағы көркем табиғат аясында ұйымдастырылған бұл ауқымды шара өңірдің экологиялық мәдениетін көтеруге, табиғатты қорғау идеясын кеңінен насихаттауға және жастардың туған жерге деген сүйіспеншілігін арттыруға бағытталды.
Фестивальдің басты нысаны – сирек кездесетін әрі Қазақстанның табиғи байлығының бірі саналатын Шұбайқызыл қызғалдағы болды. Бұл гүл түрі өзінің ерекше түсімен және табиғи әсемдігімен ерекшеленіп, тек Түлкібас өңірінде ғана өсетін құнды флоралық мұра саналады. Сондықтан оны сақтау, қорғау және көбейту мәселесі экологиялық тұрғыдан аса маңызды.
Іс-шараның ашылу салтанатында Түлкібас ауданының әкімі Асқар Естібаев сөз сөйлеп, табиғатты қорғау – әр азаматтың қасиетті міндеті екенін атап өтті. Ол өз сөзінде табиғатқа жасалған әрбір қамқорлық болашақ ұрпақтың игілігіне бағытталатынын айтып, жергілікті тұрғындарды қоршаған ортаны аялауға шақырды. «Табиғатты қорғау – бұл таңдау емес, бұл – жауапкершілік. Біз табиғатты сақтасақ, ол бізге де, келер ұрпаққа да мол игілік сыйлайды», – деген ойы көпшілікке ерекше әсер етті.
Фестиваль барысында аудандық мәслихат төрағасы С.Сәрсенбаев және ардагерлер кеңесінің төрағасы С.Қасымбек да сөз алып, шараның тәрбиелік және рухани маңызын атап өтті. Олар мұндай фестивальдер жастардың экологиялық санасын қалыптастыруда, ұлттық құндылықтарды дәріптеуде және табиғатқа деген құрметті арттыруда маңызды рөл атқаратынын жеткізді.
Фестиваль аясында ұйымдастырылған «Шырайлым Шұбайқызылым» шығармашылық байқауы жас таланттардың өнерін шыңдайтын үлкен алаңға айналды. Байқау бірнеше бағытта өтті: сурет өнері, бейнеролик түсіру және көркем әдеби шығармалар. Әр бағыт бойынша қатысушылар табиғат сұлулығын, туған жердің көркін және қызғалдақ гүлінің ерекшелігін өз туындылары арқылы бейнеледі.
Жас суретшілер арасында Дина Есболат І орынды жеңіп алса, Индира Қаратаева ІІ орынды, ал Зере Бағланбек ІІІ орынды иеленді. Олардың картиналарында көктемгі дала, қызғалдақ алқаптары және табиғаттың нәзік үйлесімі әсерлі көрініс тапқан.
Бейнеролик жасау номинациясында І орынды Ақжол Райхан иеленді. ІІ орын Дархан Әріпбайұлына бұйырса, ІІІ орын Ерлан Айдарбеков пен Руслан Орынбайға табысталды. Қатысушылар заманауи технологияларды пайдалана отырып, табиғатты қорғау, экология және туған жердің сұлулығы туралы мазмұнды бейнематериалдар ұсынды.
Жас қаламгерлер байқауында І орынды Балқыбеке Нұрислам жеңіп алды. ІІ орын Маратова Сынбатқа берілсе, ІІІ орын Жансұлу Әбдісаттар мен Рысдаулетова Несібеліге бұйырды. Олардың шығармаларында табиғатқа деген сүйіспеншілік, экологиялық жауапкершілік және рухани құндылықтар кеңінен көрініс тапты.
Фестиваль тек байқаулармен шектелмей, кең ауқымды мәдени-рухани бағдарламаға ұласты. Жергілікті және шақырылған өнерпаздар сахна төрінде өнер көрсетіп, көрермендерге ерекше көңіл-күй сыйлады. Ән мен күй, поэзия мен көркем сөз тоғысқан кеш табиғат мерекесінің мазмұнын одан әрі байыта түсті.
Сонымен қатар жас суретшілердің көрмесі ұйымдастырылып, онда шұбайқызыл қызғалдағының бейнесі, Түлкібас табиғаты және көктемгі дала көріністері бейнеленген туындылар көпшілік назарына ұсынылды. Көрме келушілер тарапынан жоғары бағаланып, ерекше ықыласқа ие болды.
Кештің қорытынды бөлігінде эстрада әншісі Азат Абилдаев және жергілікті өнерпаздар сахнаға шығып, әсем әндерімен фестивальдің шырайын кіргізді. Музыкалық нөмірлер табиғат аясындағы кештің сәнін келтіріп, қатысушыларға ұмытылмас әсер қалдырды.
Жалпы алғанда, «Шұбайқызыл алауы-2026» фестивалі – тек мәдени немесе экологиялық шара ғана емес, ол табиғат пен адам арасындағы үйлесімділікті дәріптейтін, ұрпақтар сабақтастығын нығайтатын маңызды рухани оқиға болды. Мұндай бастамалар өңір тұрғындарының экологиялық мәдениетін арттырып, табиғатқа деген жауапкершілік сезімін күшейтеді.
Фестивальдің басты түйіні – табиғатты аялау, сирек өсімдіктерді қорғау және туған өлкенің байлығын сақтау арқылы ғана болашаққа сенімді қадам жасауға болатынын көрсету. Шұбайқызыл қызғалдағы – тек гүл емес, ол туған жердің символы, табиғаттың аманаты және болашақ ұрпаққа қалатын баға жетпес мұра.