Келес ауданында ауыл шаруашылығы жерлерін аса қауіпті зиянкестерден қорғау және егістік алқаптардың қауіпсіздігін қамтамасыз ету мақсатында марокколық шегірткеге қарсы кешенді күрес жұмыстары қарқынды түрде жүргізілуде. Осы бағыттағы жағдай аудан әкімінің төрағалығымен өткен арнайы жедел штаб отырысында жан-жақты талқыланды.
Жиын барысында аудан аумағындағы фитосанитариялық ахуалға қатысты соңғы мәліметтер ұсынылды. Бүгінгі таңда Келес ауданында зерттелуі тиіс жалпы 217 600 гектар алқаптың 57 100 гектары толық тексерілген. Жүргізілген мониторинг нәтижесінде 23 192 гектар аумақта марокколық шегірткенің шоғырлануы тіркеліп, оның экономикалық зиян келтіру қаупі жоғары екені анықталған.
Осыған байланысты зиянкестердің таралуын шектеу және егістік жерлерді қорғау мақсатында химиялық өңдеу жұмыстары жүйелі түрде іске асырылуда. Қазіргі уақытқа дейін аудан бойынша жалпы 29 442 гектар жер толық залалсыздандырылған. Бұл жұмыстар алқаптардың қауіпсіздігін қамтамасыз етуге және ауыл шаруашылығы өнімдерінің шығынын болдырмауға бағытталған.
Аудан әкімі Жәнібек Ағыбаев атқарылып жатқан жұмыстардың маңыздылығына тоқталып, әрбір гектар жердің қауіпсіздігі аудан үшін стратегиялық мәнге ие екенін атап өтті. Сондай-ақ ол зиянкестердің егістік алқаптары мен жайылымдарға таралуына жол бермеу қажеттігін ерекше ескертті.
– Біз үшін әрбір гектардың қауіпсіздігі маңызды. Зиянкестердің егістік алқаптары мен жайылымдарға өтіп кетпеуін жіті қадағалауымыз қажет. Техникалық іркілістер мен мамандардың жетіспеушілігіне жол бермей, барлық күшті жұмылдыруды тапсырамын, – деді аудан басшысы жиын барысында.
Шегірткеге қарсы күрес жұмыстарының негізгі бөлігі Бірлік, Жамбыл және Бозай ауылдық округтерінде шоғырланған. Сонымен қатар Ақтөбе, Жүзімдік, Ошақты және Қошқарата ауылдық округтерінде де залалсыздандыру шаралары үздіксіз жүргізілуде. Әрбір елді мекенде мониторинг пен өңдеу жұмыстары бір мезгілде атқарылып, жағдай толық бақылауға алынған.
Аудан аумағы 19 секторға бөлініп, әр секторға жауапты мамандар бекітілген. Бұл жүйе зиянкестер ошақтарын дер кезінде анықтап, жедел әрекет етуге мүмкіндік беріп отыр. Мониторинг жұмыстарына барлығы 349 жергілікті маман және қосымша мекемелерден 129 қызметкер тартылған.
Сонымен қатар, техникалық қамтамасыз ету мәселесіне ерекше назар аударылуда. Жоспарланған 123 техниканың 119-ы қазіргі таңда далада белсенді жұмыс істеп тұр. Олардың қатарында арнайы бүріккіш қондырғылар, ауыл шаруашылығы техникалары және фитосанитариялық қызметтердің құралдары бар.
Ауданға қосымша қолдау ретінде көршілес Бәйдібек, Сауран, Түлкібас, Шардара және Төлеби аудандарынан арнайы техникалар мен мамандар тартылып, өңірдегі күрес жұмыстарының тиімділігі арттырылуда. Бұл өзара көмек механизмі өңірлік деңгейде қауіпсіздікті күшейтуге мүмкіндік беріп отыр.
Жиын барысында кейбір техникалардың істен шығуына байланысты уақытша іркілістер де талқыланды. Аудан әкімі бұл мәселелерді жедел түрде шешуді, техникаларды толық қалпына келтіруді және жұмыс қарқынын төмендетпеуді тапсырды. Сонымен қатар, жауапты сала басшыларына барлық ошақтарды толық бақылауда ұстап, өңдеу жұмыстарын үздіксіз жалғастыру міндеттелді.
Штаб отырысының қорытындысында Жәнібек Ағыбаев зиянкестерге қарсы күрестің тиімділігін арттыру, мониторингті күшейту және барлық ресурстарды толық жұмылдыру қажеттігін атап өтті.
Жалпы алғанда, Келес ауданында жүргізіліп жатқан бұл ауқымды шаралар ауыл шаруашылығы алқаптарын қорғауға, өнімділікті сақтауға және өңірдің аграрлық қауіпсіздігін қамтамасыз етуге бағытталған. Алдағы кезеңде де марокколық шегірткеге қарсы күрес жұмыстары толық аяқталғанға дейін қатаң бақылауда жалғасатын болады.