Түркістан қаласында экологиялық ахуалды жақсарту және тұрғындарға қолайлы демалыс аймағын қалыптастыру мақсатында ауқымды жоба жүзеге асырылуда. Қазіргі таңда Қарашық өзені маңында жалпы аумағы 50 гектарды құрайтын «Түркістан» экопаркінің құрылысы қарқынды жүргізіліп жатыр.
Аталған жоба Мемлекет басшысы Қасым-Жомарт Тоқаев бастамасымен қолға алынған «Таза Қазақстан» экологиялық акциясы аясында жүзеге асырылуда. Жобаның басты мақсаты – табиғи ландшафтты тиімді пайдалану арқылы өңірдің экологиялық жағдайын жақсарту, жасыл желек көлемін арттыру және қала тұрғындары мен қонақтарына арналған заманауи демалыс кеңістігін қалыптастыру.
Құрылыс жұмыстарының барысымен танысу мақсатында Нұралхан Көшеров экопарк аумағына арнайы барып, жауапты мамандармен бірге атқарылып жатқан жұмыстарды саралады. Өңір басшысы жоба сапасына ерекше назар аударып, құрылыс пен абаттандыру жұмыстарының жоғары деңгейде орындалуын тапсырды.
Мамандардың айтуынша, экопарк халықаралық экологиялық саябақтарды жобалау стандарттарына сәйкес әзірленіп жатыр. Жоба табиғатты қорғау мен орман қорын көбейтуге бағытталған заманауи бастамалардың бірі саналады. Сонымен қатар бұл аймақ алдағы уақытта Түркістан қаласының экологиялық және туристік әлеуетін арттыратын маңызды демалыс орындарының біріне айналмақ.
Қазіргі таңда экопарк аумағында тазалық және абаттандыру жұмыстары жүргізілуде. Атап айтқанда, аумақты қоқыстан тазарту, ағаштарды бұтау, шеңгелдерді шабу және ағаш түптерін әктеу жұмыстары атқарылған. Сонымен бірге Қарашық өзенінің екі жағалауын тазалау бойынша ауқымды сенбіліктер ұйымдастырылып, қоршаған ортаны ретке келтіру шаралары қолға алынған.
Экопарк аумағында жаяу жүргіншілерге арналған жолдардың алғашқы кезеңі іске қосылған. Болашақта мұнда серуендеуге арналған кең әрі жайлы жолдар салынып, тұрғындардың табиғат аясында демалуына барлық жағдай жасалады. Сонымен қатар велосипед жолақтары мен демалыс орындары қарастырылып отыр.
Инфрақұрылымды дамыту жұмыстары да қатар жүргізілуде. Қазіргі таңда аумақ толық қоршалып, мыңға жуық ағаш көшеті отырғызылған. Жалпы жоба аясында 10 мыңға жуық ағаш отырғызу жоспарланып отыр. Оның ішінде өңірдің климатына бейімделген тораңғы, үйеңкі, акация, терек және өрік секілді ағаш түрлері бар. Бұл жасыл желек алдағы жылдары Түркістан қаласының экологиялық тепе-теңдігін сақтауға және ауа сапасын жақсартуға ықпал етеді.
Жоба аясында экопарк ішінде заманауи әрі экологиялық талаптарға сай демалыс аймақтары салынады. Атап айтқанда, көпірлер, күн панельдерімен жұмыс істейтін жарық шамдары, орындықтар, арнайы барбекю аймақтары, сондай-ақ тас пен ағаштан жасалған сәндік мүсіндер орнатылады. Мұнда табиғатқа зиян келтірмейтін экологиялық таза материалдарды пайдалану көзделген.
Қазіргі уақытта осы нысандарды орналастыруға арналған аумақтарды тегістеу жұмыстары жалғасуда. Сонымен қатар экопарк кіреберісінде аркалы қақпа салу және балаларға арналған ойын алаңдарын жабдықтау жұмыстары басталып кеткен. Болашақта бұл орын отбасылық демалыс пен туристердің сүйікті мекеніне айналады деп күтілуде.
Сарапшылардың пікірінше, мұндай ірі экологиялық жобалар қала тұрғындарының өмір сапасын жақсартып қана қоймай, өңірдің туристік тартымдылығын арттыруға да үлкен мүмкіндік береді. Әсіресе соңғы жылдары Түркістан қаласының қарқынды дамуы мен туристер санының көбеюі жасыл аймақтарды көбейту қажеттігін арттырған.
Түркістан қаласында жүзеге асырылып жатқан «Түркістан» экопаркі – табиғатты қорғау мен заманауи инфрақұрылымды ұштастырған маңызды жобалардың бірі. Бұл бастама алдағы уақытта өңірдің экологиялық мәдениетін қалыптастыруға, тұрғындардың табиғатқа деген жанашырлығын арттыруға және қала келбетін көркейтуге үлкен үлес қоспақ.