Түркістан облысында өңірдің инвестициялық және туристік әлеуетін арттыруға бағытталған халықаралық әріптестік аясындағы маңызды кездесу өтті. Облыс әкімі Нұралхан Көшеров италиялық Magister Art компаниясының президенті Ренато Сапоритомен кездесіп, мәдениет, туризм, креативті индустрия және цифрлық технологияларды дамыту бағытындағы бірлескен жобаларды талқылады.
Кездесу барысында тараптар Түркістан өңірінің тарихи-мәдени мұрасын халықаралық деңгейде таныту, заманауи цифрлық шешімдерді енгізу және туристік инфрақұрылымды жетілдіру мәселелеріне ерекше назар аударды. Облыс басшылығы өңірдің инвестиция тарту әлеуеті жоғары екенін атап өтіп, жаңа сәулеттік және мәдени жобаларды бірлесе жүзеге асыруға дайын екенін білдірді.
Облыс әкімі Нұралхан Көшеров тарихи Түркістанның тек рухани орталық қана емес, сонымен бірге заманауи туризм мен инвестиция тоғысқан маңызды аймақ екенін атап өтті. Оның айтуынша, өңірде өнеркәсіп, инфрақұрылым және қызмет көрсету салаларымен қатар мәдени-рухани бағыттарға да ерекше көңіл бөлініп отыр.
– Тарихи Түркістанға қош келдіңіздер. Біз үшін инвестиция тарту, өндірісті дамыту ғана емес, туризм мен мәдениет салаларын қатар дамыту да маңызды. Жаңа архитектуралық жобалар мен шығармашылық бастамаларды талқылауға әрқашан дайынбыз, – деді облыс әкімі.
Magister Art компаниясының президенті Ренато Сапорито Қазақстанға келгеніне ризашылығын білдіріп, елдің қарқынды дамуын жоғары бағалады. Ол компанияның халықаралық тәжірибесі Түркістан өңіріндегі мәдени және туристік жобаларды жүзеге асыруға үлес қоса алатынын айтты.
Кездесу барысында тарихи нысандарды цифрлық форматта таныстыру, халықаралық көрмелер ұйымдастыру, виртуалды музейлер жасау және креативті индустрияны дамыту бағыттары кеңінен қарастырылды. Сонымен қатар мәдени мұраны заманауи технологиялар арқылы әлемдік аудиторияға таныту мәселесі де талқыланды.
Тараптар алдағы уақытта өзара ынтымақтастықты нығайтып, бірлескен жобаларды нақты іске асыру мүмкіндіктерін зерттеуге уағдаласты. Бұл бастама Түркістанның халықаралық туристік бренд ретінде дамуына серпін бермек.
Айта кетейік, Magister Art – мәдениет пен креативті индустрия саласында жұмыс істейтін, цифрлық технологияларға негізделген инновациялық компания. Оның негізгі бағыттарына дизайн және архитектура, медиа, бренд-коммуникациялар, IT және редакциялық-бизнес стратегиялар кіреді. Компанияның басты миссиясы – ұлттық мәдени мұраны заманауи форматта таныту және оны жаһандық кеңістікке шығару.
Сарапшылардың пікірінше, мұндай халықаралық әріптестік Түркістан облысының туризм саласын жаңа деңгейге көтеріп қана қоймай, өңірге жаңа инвестициялар тартуға және креативті экономиканы дамытуға жол ашады.