Түркістан облысының Сауран ауданында қайта өңдеу өнеркәсібі мен азық-түлік өндірісін дамытуға бағытталған жаңа инвестициялық жоба іске қосылды. Иассы ауылдық округіне қарасты Еңбекші Диқан елді мекеніндегі «Дәморда» өндірістік алаңында құны 200 миллион теңгені құрайтын балмұздақ өндіретін кәсіпорынның қазық қағу рәсімі өтті.

Салтанатты іс-шараға Сауран ауданының әкімі Мақсат Таңғатаров, аудандық мәслихат депутаттары, кәсіпкерлер және тиісті сала өкілдері қатысты. Жоба бастамашылары мен жергілікті билік өкілдері өндірістік инфрақұрылымды дамыту, инвестиция тарту және жаңа жұмыс орындарын ашу өңір экономикасының негізгі басымдықтарының бірі екенін атап өтті.

Аудан әкімі өз сөзінде мұндай өндірістік жобалардың жүзеге асуы жергілікті экономиканың әртараптануына және ауылдық жерлердің дамуына серпін беретінін айтты. Оның айтуынша, ауылдық аумақтарда өндіріс орындарын ашу тұрғындарды тұрақты жұмыспен қамтуға және ішкі нарықты отандық өніммен қамтамасыз етуге мүмкіндік береді.

Жоба Қазақстандағы және Орталық Азиядағы жетекші балмұздақ және мұздатылған өнімдер өндірушілерінің бірі саналатын «Шин-Лайн» компаниясының өндірістік желісін кеңейту аясында жүзеге асырылып отыр. Компания бүгінгі таңда балмұздақтың 160-тан астам түрін, сондай-ақ сүт өнімдері мен мұздатылған жартылай фабрикаттарды өндірумен айналысады.

Жаңа өндіріс орны іске қосылғаннан кейін өңірдегі қайта өңдеу өнеркәсібінің дамуына айтарлықтай серпін бермек. Сонымен қатар отандық өнім өндірісінің көлемін арттырып, ауыл шаруашылығы шикізатын тиімді пайдалануға жол ашады.

Кәсіпорынның тағы бір маңызды артықшылығы – экспорттық әлеуеті. Жоба толық іске қосылған жағдайда өнімдер ішкі нарықпен қатар Ресей, Қытай, Өзбекстан, Қырғызстан, Моңғолия, Беларусь және Сауд Арабиясы сияқты 10-нан астам елге экспортталатын болады.

Бұл өз кезегінде Түркістан облысының ғана емес, жалпы Қазақстанның азық-түлік өнеркәсібі саласындағы экспорттық мүмкіндіктерін кеңейтуге ықпал етеді.

Өңірде мұндай ірі өндірістік жобалардың жүзеге асуы инвестициялық тартымдылықты арттырып, жаңа жұмыс орындарының құрылуына жол ашуда. Сарапшылардың пікірінше, ауылдық жерлерде заманауи өндіріс орындарын дамыту өңірлік экономиканың тұрақты өсуіне және халықтың өмір сүру сапасын жақсартуға тікелей әсер етеді.

Сауран ауданында қолға алынған бұл жоба тек балмұздақ өндірісімен шектелмей, сүт өнімдері мен мұздатылған жартылай фабрикаттар шығаратын толыққанды өндірістік кешен ретінде дамитын болады.

Жалпы алғанда, Түркістан облысында агроөнеркәсіптік кешен мен қайта өңдеу саласын дамыту бағытында жүзеге асырылып жатқан мұндай жобалар өңір экономикасының жаңа деңгейге көтерілуіне негіз болып отыр.