Түркістан облысында еңбек құқықтарын қорғау, еңбек қатынастарының ашықтығын қамтамасыз ету және жұмысшылардың әлеуметтік қауіпсіздігін күшейту бағытындағы өзекті мәселелерге арналған маңызды жиын өтті. Кездесуді облыс әкімінің орынбасары Нұрбол Тұрашбеков өткізді.
Жиын барысында өңірде электронды еңбек шарттарын тіркеу, міндетті зейнетақы жарналарын уақытылы аудару және қызметкерлерді жазатайым оқиғалардан сақтандыру мәселелері жан-жақты қаралды. Сондай-ақ аталған бағыттар бойынша нақты көрсеткіштер сараланып, орындалу барысы талқыланды.
Облыстық жұмыспен қамтуды үйлестіру және әлеуметтік бағдарламалар басқармасының басшысы Мекенхан Қозыханұлы Өңірлік жұмыспен қамту картасының орындалуы жөнінде баяндама жасады. Оның айтуынша, бүгінгі таңда 663 мекеме 1314 азаматтың еңбек шарттарын электронды жүйеге енгізген. Дегенмен бұл бағыттағы жұмыстар Бәйдібек, Созақ аудандары мен Кентау қаласында әлі де жеткіліксіз деңгейде орындалуда.
Міндетті зейнетақы жарналарын (МЗЖ) аудару бойынша да жұмыстар жүргізілуде. Жауапты мамандар аудан-қалаларда жұмыс берушілерге құқықтық және әдістемелік түсіндіру жұмыстарын ұйымдастырып жатыр. Нәтижесінде 1–7 маусым аралығында 1920 заңды тұлға 9612 қызметкер үшін зейнетақы жарналарын аударған.
Жалпы өңір бойынша 30 мыңнан астам азаматты міндетті зейнетақы төлемдерімен қамту жоспарланған. Бұл бағыт азаматтардың әлеуметтік қорғалу деңгейін арттыруға және еңбек қатынастарының заңдылығын қамтамасыз етуге бағытталған.
Жиында сондай-ақ қызметкерлерді өндірістік жазатайым оқиғалардан сақтандыру мәселесі де қаралды. Қазіргі таңда облыста 387 мекеме сақтандыру шарттарын рәсімдеген. Алайда Келес, Жетісай және Мақтаарал аудандарында бұл бағыттағы жұмыстардың жеткіліксіз екені атап өтілді.
Облыс әкімінің орынбасары Нұрбол Тұрашбеков еңбек қатынастарын заңдастыру мен әлеуметтік қорғау жүйесін күшейтудің маңыздылығына тоқталып, бірқатар нақты тапсырмалар берді. Ол еңбек шартын жасамаған, зейнетақы жарналарын аудармаған немесе сақтандыру шартын рәсімдемеген жұмыс берушілерге заң аясында тиісті шаралар қолданылатынын ескертті.
Сондай-ақ аудан-қала әкімдерінің жауапты орынбасарларына көрсеткіштері төмен өңірлерде жұмысты күшейту, түсіндіру жұмыстарын арттыру және еңбек заңнамасының сақталуын қатаң бақылауға алу тапсырылды.
Жиын қорытындысында өңірде еңбек қатынастарының ашықтығын қамтамасыз ету, жұмысшылардың әлеуметтік құқықтарын қорғау және заң бұзушылықтардың алдын алу бағытындағы жұмыстар жүйелі түрде жалғасатыны атап өтілді.