Бүгінгі таңда Түркістан облысы бойынша суармалы жердің жалпы көлемі — 552 мың гектар. Өңір республикада егін егу саласында алдыңғы қатарда. Жыл сайынғы су тапшылығы мәселесі биыл оң шешімін тауып отыр. Қазіргі уақытта «Қазсушар» РМК ТФ мекемесі арқылы ағын сумен 332 мың гектар егіндік жер қамтамасыз етіледі. Бүгінде филиалдың су нысандары арқылы егістікті суғаруға бөлінген ағын су көлемі — 871,06 млн текше метр құрап отыр. Бұл жайында «Қазсушар» РМК Түркістан филиалының директоры Қазыбек Бедебаев брифингте мәлімдеді.
«Қазсушар» РМК тарапынан 2024 жылғы егіндікті суғару маусымына дайындық барысында былтыр арнайы техникаларымен жалпы ұзындығы 616 шақырымды құрайтын 204 каналға механикалық тазалау жұмыстары жүргізілді. Сондай-ақ, биыл арналардың 302 шақырымына механикалық тазалау жұмыстары жүргізілді. Нәтижесінде облыс аумағындағы егістік алқаптарға ағын су жеткізу мүмкіндігі артты,- деді Қазыбек Қошқарбекұлы.
Мекеме су тұтынушылармен тікелей келісім-шарт жасау арқылы ағын су жеткізу қызметін аттыра түспек. Осы бағытта «Қазсушар» РМК Түркістан филиалына қосымша 177 қызметкер жұмысқа қабылданған. Айта кетерлігі, қазіргі таңда филиалға қарасты барлық 18 суқоймада жинақталған су қоры 5497,371 млн текше метрді құрайды.
Осы кезде Мемлекет басшысы Қасым-Жомарт Тоқаевтың тапсырмасына сәйкес, еліміздің барлық өңірлерінде бір ай бойы «Таза Қазақстан» республикалық экологиялық акциясы өтті. Экологиялық мәдениетті қалыптастыру, қоршаған ортаның тазалығын сақтау жұмыстары жүйелі түрде жоспарға сай жүргізілді. Дегенмен, туристтер, демалушылар арасында тазалыққа жауапкершілікпен қарамайтын азаматтар әлі де жол бойына қоқыс тастап, өздері демалған орынды ластап кетуде. Түркістан облысының әкімі Дархан Сатыбалды Төлеби ауданы тұрғындармен кездесуде тазалық шараларын сақтауға шақырған болатын. Осы ретте аудан аумағында жалпы аудандық сенбілік өтті. ҚР Мемлекеттік қызмет істері агенттігінің Түркістан облысы бойынша департаменті жанынан құрылған «Еріктілер кеңесінің» ұйымдастыруымен Ақмешіт демалыс аймағы күл-қоқыстан тазартылды.
Тазалық шарасына ҚР Мемлекеттік қызмет істері агенттігінің Түркістан облысы департаментінің басшысы Өркен Балажанов бастаған ерікті мемлекеттік қызметшілер, аудан әкімі Төлеген Телғараев, әкімдік қызметкерлері қатысты. «Тазалық – табалдырықтан басталады», сондықтан қоршаған ортаның тазалығына жауапкершілікпен қарау әр азаматтың басты міндеті.
Сенбілік барысында қатысушылар жол бойын, өзен жағалауын күл-қоқыстан тазартып қана қоймай, халық көп шоғырланатын орындарға тазалыққа шақыратын арнайы тақтайшалар «Табиғатты құрметте», «Қоқысты өзіңмен алып кет», «Қоқыссыз таза табиғат», «Табиғатты ластама» тақырыптарында орнатылды.
БИЫЛ ТҮРКІСТАН ОБЛЫСЫНДА АҒЫН СУ ТАПШЫЛЫҒЫ БОЛМАЙДЫ
