4-маусым еліміз үшін айрықша мереке — ҚР Рәміздер күні. Осы күнді кентаулықтар қаладағы Рәміздер алаңына жиналып әрұранды жанды дауыста шарықтата орындады. Мерекелік шараға қала әкімі Жандос Тасов, қалалық маслихат депутаттары, зиялы қауым өкілдері, спортшылар, ұстаздар мен оқушылар, қала жастары қатысты.
«Сіздерді Қазақстан Республикасының Мемлекеттік рәміздер күнімен шын жүректен құттықтаймын!Отанды, туған жерді сүю Мемлекеттік рәміздерге деген құрметтен басталады. Еліміздің Әнұраны әлемдік олимпиада ойындарында Қазақстан спортшыларының құрметіне талай рет шырқалып, рух беріп келеді. Әлі де шырқала беретініне сенімдімін. Мемлекеттік рәміздеріміз алғашқы қазақстандық ғарышкерлермен бірге ғарышта да болып қайтты. Осының бәрі тарих. Осы мемлекеттік рәміздер – біздің егемендігіміздің мәңгілік екенін айшықтайды» деген қала әкімі барша тұрғындарды мерекемен құттықтады.
Аға буын өкілдері рәміздердің маңыздылығы туралы ой қозғаса, қаланың белсенді жастары мемлекеттік рәміздерді қастерлеу, құндылықтарды құрметтеу жөнінде ұран тастады.
Мектеп оқушылары тәуелсіздіктің қасиетті, біріктіруші бейнесін танытатын Рәміздер жайында жыр-шумақтарын орындап, Отанымыз Тәуелсіз Қазақстанға арналған әсем әуендер шырқалды. Мемлекеттік рәміздерді құрметтеуге шақырған іс-шара кентаулықтарға көтеріңкі көңіл-күй сыйлап, елдің патриоты болу, отаншылдық дәріптелді. Осы кезде Астана қаласындағы «Aspan» спорт кешенінде Асық ату спортынан жасөспірімдер арасында Қазақстан Республикасының жекелей және командалық чемпионаты өтті. Додаға еліміздің 17 өңірінен келген 132 спортшы қатысты.
Төрт күнге созылған байрақты бәсекеде ұлдар арасында Түркістан облысының ұландары ел чемпионы атанды. Екінші орынды Алматы облысы алса, үшінші орынға Қызылорда облысының командасы жайғасты. Ал қыздар арасында Қызылорда облысының құрамасы 1-орын алса, жүлделі 2-орынға Түркістан облысынан келген команда ие болды. Атыраулық бұрымдылар 3-орынды иемденді.
Сайыстың марапаттау рәсіміне ҚР Асық ату федерациясының атқарушы директоры Азамат Манапов, Асық ату спортының негізін қалаушы Жомарт Сабыржанұлы, Асық атудан мемлекеттік жаттықтырушы Жомарт Оразов, ұлттық спорт жанашыры Серік Халеловтер қатысып, жүлделерді табыс етті.
КЕНТАУЛЫҚТАР РӘМІЗДЕР КҮНІНДЕ ӘНҰРАНДЫ ЖАНДЫ ДАУЫСТА ОРЫНДАДЫ
