Мемлекет басшысы «Түркістан қаласының ерекше мәртебесі туралы» Қазақстан Республикасының Заңына қол қойды. Құжат еліміздің рухани, тарихи-мәдени және туристік орталығы саналатын көне шаһардың мәртебесін айқындайды.
Аталған заң жобасын әзірлеу жөніндегі жұмыс тобына Мәжіліс депутаты, “AMANAT” партиясы фракциясының мүшесі Темір Қырықбаев жетекшілік етті. Құжатта Түркістанның тарихи-мәдени мұрасын сақтау, археологиялық және ғылыми-реставрациялық жұмыстарды реттеу, ұлттық қолөнерді дамыту сынды маңызды нормалар қамтылған.
Сонымен қатар, қорғалатын аймақта сәулеттік келбетке сай келмейтін ғимараттар салуға тыйым салынады. Қаланың бірегей архитектуралық стилін сақтау үшін дизайн код енгізіліп, археологиялық ескерткіштердің резерватын құру көзделген.
Заң аясында мүгедектігі бар азаматтар үшін қолжетімді инфрақұрылым қалыптастыру, инклюзивті туризмді дамыту, қолөнершілерге мемлекет тарапынан қолдау көрсету және көлік логистикасын реттеу шаралары да қарастырылған.
Түркістанның тарихи мәртебесін сақтай отырып, қаланың дамуына серпін беретін құжат тиімді басқару мен бақылауды қамтамасыз ету мақсатында жергілікті атқарушы органдардың өкілеттігін кеңейтуге мүмкіндік береді.
Түркістанның ерекше мәртебесі заңмен бекітілді
