Бүгін IV шақырылымдағы Шымкент қаласы қоғамдық кеңесінің бірінші отырысы өтті. Отырысты Шымкент қаласы қоғамдық кеңесін қалыптастыру жөніндегі жұмыс тобының жетекшісі Әлтеев Бауыржан Ілімшаұлы ашып, жүргізіп отырды.
Жиынға Шымкент қаласы мәслихатының төрағасы Нарымбетов Бахадыр Мәдәліұлы қатысып, қоғамдық кеңестің жаңа мүшелерінің алдағы жұмыстарына сәттілік тілеп, кеңес куәлігін және төсбелгісін табыстады.
Шымкент қаласы қоғамдық кеңесінің IIІ шақырылымының өкілеттілігі 2025 жылдың 30 наурыз күні аяқталды. «Қоғамдық кеңестер туралы» Заңға сәйкес кеңестердің жаңа құрамын қалыптастыру рәсімі жұмыс істеп тұрған құрамының өкілеттіктер мерзімі өткенге дейін екі ай бұрын басталады. Осыған орай, қоғамдық кеңесті қалыптастыру жөніндегі жұмыс тобы жасақталды. Жұмыс тобы Заңға, ережедегі талапқа сәйкес, Шымкент қаласының Қоғамдық кеңес мүшелерін сайлау жөнінде конкурс өткізілетіні туралы хабарландыру жариялап, құжат тапсырған кандидаттар арасынан ашық дауыс беру арқылы қоғамдық кеңеске 29 мүше сайлады.
Кеңес құрамы түрлі сала өкілдерінен тұрады. Басым көпшілігі Азаматтық қоғам өкілдері, мәдениет, білім, медицина саласы өкілдері, заңгер, журналист және кәсіпкерлік саласының өкілдері. Кеңес құрамында гендерлік және этностық саясат теңдігі сақталған.
Отырыс барысында Шымкент қаласы қоғамдық кеңесінің мүшелері арасынан, кеңес мүшелерінің ұсынысымен, ашық дауыс беру арқылы «Shymkent» ӘКК» АҚ Шымкент қаласындағы Филиал директорының орынбасары Парманов Бұхарбай Рысқұлұлы қоғамдық кеңес төрағасы болып сайланды.
Жиын соңында күн тәртіне сәйкес, Шымкент қаласы қоғамдық кеңесінің ережесі бекітілді.
IV ШАҚЫРЫЛЫМДАҒЫ ҚОҒАМДЫҚ КЕҢЕСТІҢ ҚҰРАМЫ САЙЛАНДЫ
