Түркістан облысында өңір экономикасын әртараптандыру, инвестициялық ахуалды жақсарту және отандық өндірісті дамыту бағытындағы жүйелі жұмыстар нақты нәтижесін беріп келеді. Соның айқын дәлелі – Түркістан қаласында жылына 10 миллион метр джинсы матасын өндіретін ірі тоқыма зауытының құрылысы басталып, салтанатты түрде капсула салу рәсімінің өтуі.
Маңызды шараға Түркістан облысының әкімі Нұралхан Көшеров пен «Hygeia Textile Kazakhstan» ЖШС директоры Жин Ёуйй қатысып, мақта-мата жібін иіру және джинсы маталарын өндіретін заманауи кәсіпорынның іргетасын қалады. Бұл жоба өңірдің ғана емес, еліміздің жеңіл өнеркәсіп саласы үшін стратегиялық маңызға ие.
Мақта кластері – өңірлік дамудың өзегі
Салтанатты рәсімде сөз сөйлеген облыс әкімі Нұралхан Көшеров Мемлекет басшысының биылғы Жолдауында айқындалған экономиканы әртараптандыру және терең өңдеуді дамыту міндеттері Түркістан өңірінде нақты жобалар арқылы іске асып жатқанын атап өтті.
«Бүгін Түркістан өңірінің жеңіл өнеркәсіп саласында стратегиялық маңызды жобаның іргетасы қалануда. Арнайы экономикалық аймақта джинсы маталарын өндіретін заманауи зауыт салынады. Біз Түркістан облысында мақта кластерін дамытуды бастап кеттік. Бұдан былай өңірде өсірілетін мақта 100 пайыз өзімізде өңделіп, дайын өнімге айналады. Бұл зауыт – еліміздің тоқыма өндірісін жаңа деңгейге шығаратын ірі жоба», – деді облыс басшысы.
Жоба аясында жылына 30 мың тонна мақта-мата жібі мен 10 миллион метр джинсы матасы өндіріледі. Дайын өнімдер ішкі нарықпен қатар Еуропа және Орталық Азия елдеріне экспортқа бағытталмақ. Бұл өз кезегінде Қазақстанның экспорттық әлеуетін арттырып, импортқа тәуелділікті азайтуға мүмкіндік береді.
Толық жеке инвестиция, заманауи технология және жаңа жұмыс орындары
Аталған жобаның жалпы құны 23,3 млрд теңгені құрайды және толықтай жеке инвестордың қаражаты есебінен жүзеге асырылады. Зауыт «Turan» арнайы экономикалық аймағында орналасады. Нысанның жалпы аумағы 20 гектарды қамтиды.
Кәсіпорын жұмысына қажетті құрал-жабдықтар әлемдік стандарттарға сай заманауи технологиялармен жабдықталады. Өндіріс үдерісінде цифрландыру мен автоматтандыру кеңінен қолданылып, өнім сапасы халықаралық талаптарға сәйкес болмақ.
Ең бастысы, зауыт іске қосылған кезде мыңнан астам жаңа жұмыс орны ашылады. Бұл – өңірдегі әлеуметтік тұрақтылықты нығайтып, халықтың тұрақты табыс көзін арттыруға бағытталған маңызды қадам.
Жобаны үш кезеңмен жүзеге асыру жоспарланған. Әр кезең өндірістік қуатты біртіндеп арттыруға және нарық сұранысына бейімделуге мүмкіндік береді.
Түркістан – тоқыма өнеркәсібінің жаңа орталығына айналуда
Сарапшылардың пікірінше, Түркістан облысы – мақта шаруашылығы дамыған, логистикалық мүмкіндігі жоғары және еңбек ресурсы жеткілікті өңір. Осы факторлар жеңіл өнеркәсіпті, соның ішінде тоқыма өндірісін дамытуға қолайлы жағдай қалыптастырып отыр.
Облыс әкімінің айтуынша, бұл жоба Түркістанды Қазақстандағы тоқыма өнеркәсібінің ірі орталықтарының біріне айналдыруға жол ашады. Сонымен қатар, шикізатты терең өңдеу арқылы қосылған құны жоғары өнім шығару өңір экономикасының тұрақты өсуіне серпін береді.
Өнеркәсіптегі өсім – жүйелі жұмыстың нәтижесі
Жалпы, облыста индустриалды аймақтар, шағын өндірістік парктер мен арнайы экономикалық аймақтардың жұмысын жандандыру нәтижесінде биылғы 10 айда өнеркәсіп өнімінің көлемі 1,3 трлн теңгеге жетіп, өсім 113,4 пайызды құрады. Бұл көрсеткіш өңірде қолға алынған индустриялық-инновациялық саясаттың тиімділігін дәлелдейді.