Түркістан облысында жаңа өндіріс орындарын ашуға бағытталған келіссөздер қарқынды түрде жалғасып келеді. Өңір басшылығы шетелдік және отандық инвесторлармен бірқатар кездесулер өткізіп, облыстың экономикалық әлеуетін және индустриялық аймақтардың мүмкіндіктерін таныстыруда. Инвестициялық жобалардың көптеп қолға алынуы өңірге жаңа технологиялар әкеліп қана қоймай, мыңдаған жұмыс орнын ашуға мүмкіндік береді. Бұл – Түркістанды еліміздің өндірістік және логистикалық орталықтарының біріне айналдыруға бағытталған маңызды қадамдардың бірі.
Түркістан қаласында өткен «TURKISTAN INVESTMENT AND TOURISM FORUM – 2025» халықаралық инвестициялық форумы аясында Түркістан облысының әкімі Нұралхан Көшеров шетелдік инвесторлармен кезекті рет кездесу өткізді. Кездесуге Қытайдың ірі компаниялардың өкілдері қатысып, оларға өңірдің экономикалық әлеуеті мен инвестициялық мүмкіндіктері кеңінен таныстырылды. Әкім инвесторларға Түркістан облысының стратегиялық артықшылықтарын, инфрақұрылымдық дамуын және бизнес жүргізуге қолайлы жағдайлар жасалғанын атап өтті.
– Интеграция мен экономикалық ынтымақтастықты одан әрі тереңдету аясында біз өңіріміздің өндіріс саласына шетел компанияларының қатысуын арттыруды жоспарлап отырмыз. Сіздер, Орталық Азия, Қытай, Ресей және Еуропаны жалғайтын транзиттік дәліздің стратегиялық қиылысында орналасқан Түркістан облысына инвестиция құю арқылы үлкен нарыққа жол ашасыздар. Облысымызда индустриалды аймақтар, арнайы экономикалық аймақтар бар. Өндірісті дамытып, жаңа зауыттар ашуға қолдау көрсетіледі, – деді Нұралхан Көшеров.
Инвесторлар күн және су электр станциясын салу, көлік-логистикалық сала, құрылыс, ауыл шаруашылығы өнімдерін терең өңдеу, туризм бағыттары бойынша ұсыныстарын айтты. Сонымен бірге дайын жобалар болса, қаржы салуға да дайын екенін жеткізген компаниялар да болды. Кездесуде облыста жүзеге асып жатқан жобаларға қатысты мәселелер де тыңдалып, инфрақұрылымға қатысты түйткілдерді шешу бойынша тапсырмалар берілді.
Айта кетейік, Түркістан облысында инвестиция тарту, өндіріс орындарын көбейтуге басымдық берілген. Жалпы өңірде 2025-2028 жылдар аралығында жүзеге асатын 111 инвестжобалар пулы қалыптасқан. Жоба толық іске асқан жағдайда 23 915 жаңа жұмыс орнын ашу көзделген. Биыл 58 инвестициялық жоба қолға алынып, нәтижесінде 8 250 тұрақты жұмыс орны ашылады. Бүгінде 34 инвестжоба іске қосылып, 4889 адам жұмыспен қамтылды. Сонымен қатар биыл 10 айдың қорытындысымен облыстың капиталына 1 178,4 млрд. теңге көлемінде инвестиция тартылған. Облысқа 2025 жылға 475 млн. АҚШ доллары көлемінде тікелей шетелдік инвестициялар тарту индикаторы бекітілген. II тоқсанның қорытындысымен тікелей шетелдік инвестициялар көлемі 543,5 млн. АҚШ долларын құрап, жылдық жоспар артығымен орындалды.
Жүргізіліп жатқан келіссөздер Түркістан облысының инвестициялық тартымдылығын арттыруға және өңірде жаңа өндірістік қуаттарды қалыптастыруға бағытталған. Индустриялық аймақтар мен инфрақұрылымның дайын болуы инвесторлар үшін қолайлы жағдай жасап, бірқатар жобалардың жүзеге асуына жол ашады. Алдағы уақытта келіссөздер нәтижесі нақты өндіріс орындарының іске қосылуына, жаңа жұмыс орындарының пайда болуына және облыстың экономикалық көрсеткіштерінің жақсаруына ықпал етуі күтіліп отыр.