Түркістан облысы егістік алқаптарын тиімді сумен қамтамасыз ету мәселесін басты назарда ұстап отыр. Өңірдегі жалпы ұзындығы 12 731 шақырымды құрайтын 4180 каналдың 76%-ы қазіргі таңда жөндеуді қажет етеді. Бұл мәселені шешу мақсатында облыс әкімінің бастамасымен кешенді жоспар қабылданды.
Жоспарланған шаралар
Облыстағы су нысандарын қалпына келтіру бойынша Ислам Даму банкі қаржыландыратын 302 нысанды жөндеу жұмыстары көзделуде. Жөндеу нәтижесінде каналдардың тозу көрсеткіші 50%-ға дейін төмендеуі жоспарланып отыр.
Облыс әкімінің орынбасары Нұрбол Тұрашбеков мәселені зерделеу барысында:
«Барлық деңгейдегі су арналарының жағдайын баяндаңыздар. Шаруа үшін әр арықтың жағдайы маңызды. Өз күшімізбен реттеуге болатын мәселелерді шешуге кірісу қажет, ал қаржы қажет ететін арналар сумен қамтылатын аумақ көлеміне қарай жөнделеді», – деді.
Аудандардағы өзекті мәселелер
Ордабасы ауданы:
«Құртай» каналы жер арық күйінде болғандықтан, су фильтрация арқылы көп жоғалады. Арнаның тереңдеп кеңеюі су жеткізуді қиындатуда, жыл сайын қамыс бітеліп, тұрақты механикалық тазалауды қажет етеді. Жобалау-сметалық құжаттар әзірленіп, күрделі жөндеу арқылы 1000 гектардан астам жерге су жеткізу жақсарады.
Келес ауданы:
«Оймауыт» су торабының жағдайы өзекті мәселе ретінде қаралуда.
Бәйдібек ауданы:
«Комсомол» каналын толық қуатта пайдалану үшін 16,3 шақырымын жөндеу қажет, ал ішкі лоток жүйелерінің тозуы байқалады.
Шардара ауданы:
Жаушықұм массивінде 12 192 гектар егістікке су жеткізетін құбыр мен сорғы станциясының жағдайы тексерілді.
Сарыағаш ауданы:
«Р-4-2», «Шаншар құлақ», «Құлтума», «Кескен», «Сарыүйсін», «57-тармақ», «Қаратас», «Рамадан», «Шошым», «Р-15» каналдары жөндеуді қажет етеді.
Кентау қаласы:
«Ырмақ-Өзен» су қоймасы екі жыл бұрын «Тұран су» мекемесі тарапынан ағымдағы жөндеуден өткен. Дегенмен мәселені толық шешу үшін күрделі жөндеу қажет, сонымен қатар Ырмақ өзенінен су қоймасына дейін құбыр тарту және «Таздар» арығын бетондау маңызды болып отыр.
Тиісті тапсырмалар мен бақылау
Нұрбол Тұрашбеков көтерілген мәселелер бойынша жауапты басқармаларға нақты тапсырмалар беріп, орындалу мерзімін бекітті. Барлық аудан-қала әкімдіктері өз аумақтарындағы каналдар мен су нысандарының жағдайын қатаң бақылауға алып, жөндеу жұмыстарын кезең-кезеңімен жүзеге асырады.
Облыс әкімдігінің бұл бастамасы Түркістандағы егістік алқаптарын тиімді сумен қамтамасыз ету және аумақтық су инфрақұрылымын жаңғырту мақсатында қабылданған жүйелі шаралардың айқын көрінісі болып отыр.