Түркістан облысында ауыл шаруашылығы дақылдарын зиянкестерден қорғау бағытындағы жұмыстар күшейтіліп, шегірткеге қарсы күрес жүйелі түрде жүргізілуде. Биылғы маусымда бұл бағыттағы шаралар ерекше бақылауға алынып, техника мен жұмыс күшін түгендеу күнделікті негізде жүзеге асырылып отыр.
Үйірлі шегірткеге қарсы химиялық өңдеу жұмыстарын үйлестіру және ұйымдастыру барысын тексеру мақсатында облыс әкімінің орынбасары Нұрбол Тұрашбеков Арыс қаласында орналасқан арнайы штабта болып, жауапты сала өкілдерінің есебін тыңдады. Жиында өңірдегі фитосанитарлық жағдай, атқарылып жатқан жұмыстар және алдағы жоспарлар жан-жақты талқыланды.
Арыс қаласы әкімінің орынбасары Ерғали Қуандықтың мәліметінше, 2026 жылы зиянкеске қарсы жалпы 91 100 гектар алқапты химиялық өңдеуден өткізу жоспарланған. Бұл аумақтар 17 секторға бөлініп, әр секторда жұмыс жүргізетін мамандарға қажетті жағдайлар, оның ішінде жатын орындар ұйымдастырылған.
Өңдеу жұмыстарының сапалы жүргізілуі үшін инфрақұрылым мәселесіне де ерекше көңіл бөлінген. Қазіргі таңда әр секторды сумен қамтамасыз ету мақсатында 52 су көзі белгіленіп, су тасымалдауға 17 арнайы көлік дайындалған. Сонымен қатар химиялық өңдеуге 112 бүріккіш техника жұмылдырылмақ. Бұл техникалар зиянкестерді жою жұмыстарын уақытылы әрі тиімді жүргізуге мүмкіндік береді.
Өңірдегі фитосанитарлық ахуал туралы Республикалық фитосанитарлық диагностика және болжамдар әдістемелік орталығының Түркістан облыстық филиалының басшысы Нұрлыбек Біләлбеков баяндама жасады. Оның айтуынша, қазіргі таңда Арыс қаласы бойынша 8 секторда 19 шегіртке ошағы анықталған.
Ал Сарыағаш ауданында 12 секторда дернәсілдердің жер бетіне шыққаны тіркелген. Келес ауданында барлық секторларда дернәсіл белсенділігі байқалуда. Бұл көрсеткіштер өңірде зиянкестерге қарсы күресті күшейтудің маңыздылығын көрсетеді.
Сонымен қатар Ордабасы ауданында да нақты жұмыстар атқарылуда. Аудан әкімінің орынбасары Мейрамбек Акмуратовтың айтуынша, бүгінгі күнге дейін 47 мың гектар жер зерттеліп, оның 26,3 мың гектарын химиялық өңдеуден өткізу жоспарланған. Бұл жұмыстарды ұйымдастыру үшін 3 сектор белгіленіп, жауапты мамандар бекітілген. Сонымен қатар жер иелеріне алдын ала хабарламалар таратылып, анықтаушылар тізімі нақтыланған.
Жиын барысында Нұрбол Тұрашбеков бірқатар нақты тапсырмалар берді. Атап айтқанда, ауыл шаруашылығы тауарын өндірушілерге, жайылым жер мен мал иелеріне алдағы химиялық өңдеу жұмыстары туралы алдын ала ескерту қажеттігін тапсырды. Сонымен бірге техникалық қауіпсіздік талаптарын қатаң сақтау және түсіндіру жұмыстарын жүргізу міндеттелді.
Әсіресе, химиялық препараттарды қолдану мөлшерлемесін қатаң бақылау мәселесіне ерекше назар аударылды. Бұл – қоршаған ортаға зиян келтірмеу және адамдар мен жануарлардың қауіпсіздігін қамтамасыз ету үшін аса маңызды. Сонымен қатар анықтаушылар мен жұмысшылардың қауіпсіздігі де басты назарда.
Мобильді топ жетекшілеріне әр секторда күнделікті мониторинг жүргізу, техника мен жұмыс күшін толық түгендеу және атқарылған жұмыстар бойынша штабқа уақытылы есеп беру тапсырылды. Мұндай жүйелі бақылау шегірткеге қарсы күрес шараларының тиімділігін арттырып, егіс алқаптарын сақтап қалуға мүмкіндік береді.
Жалпы алғанда, Түркістан облысында жүргізіліп жатқан бұл жұмыстар ауыл шаруашылығы саласының тұрақтылығын қамтамасыз етуге бағытталған. Уақтылы әрі сапалы жүргізілген фитосанитарлық шаралар диқандардың еңбегін қорғап, мол өнім алуға негіз қалайды.