Түркістан облысында ауыл шаруашылығы саласын дамыту бағытындағы жүйелі жұмыстар 2026 жылы да жоғары қарқынмен жалғасып, өңірдің аграрлық әлеуетін арттыруға тың серпін беріп отыр. Облыс экономикасының негізгі тіректерінің бірі саналатын бұл салада көктемгі егіс науқаны белгіленген жоспарға сай ұйымдастырылып, нақты нәтижелерге қол жеткізілуде. Әсіресе, техника паркін жаңарту, егіс алқаптарын тиімді игеру және мемлекеттік қолдау шараларын кеңінен пайдалану – аграрлық саясаттың басым бағыттарына айналған.
Облыс әкімі Нұралхан Көшеровтің тапсырмасына сәйкес, көктемгі дала жұмыстары барлық аудан мен қалада үйлесімді түрде жүргізілуде. Биыл өңір бойынша жалпы 536 мың гектар алқапқа жаздық дақылдар егу жоспарланған. Қазіргі таңда оның 165 мың гектары игеріліп, егіс жұмыстары қарқынды жалғасып жатыр. Егіс құрылымына назар аударсақ, дәнді дақылдар 55 мың гектарға, майлы дақылдар 29 мың гектарға, жоңышқа 40 мың гектарға егілген. Сонымен қатар көкөніс дақылдары 15 мың гектарды, картоп 6 мың гектарды, ал бақша дақылдары 19 мың гектар алқапты қамтып отыр. Бұл көрсеткіштер өңірдегі аграрлық жұмыстардың жүйелі әрі жоспарлы жүргізіліп жатқанын аңғартады.
Ауыл шаруашылығы өндірісінің тиімділігін арттыруда техникалық жарақтандырудың рөлі ерекше. Осы бағытта Түркістан облысында соңғы жылдары техника паркін жаңарту жұмыстары қарқынды жүзеге асырылып келеді. Биылдың өзінде өңірде 223 жаңа ауыл шаруашылығы техникасы сатып алынды. Бұл – егіс пен егін жинау жұмыстарын уақытылы әрі сапалы орындауға мүмкіндік беретін маңызды фактор. Жалпы дала жұмыстарына 37,4 мыңнан астам техника жұмылдырылып, толық дайындық қамтамасыз етілген.
Техникалық жаңғырту ісінде мемлекеттік қолдау тетіктері тиімді пайдаланылуда. Атап айтқанда, «ҚазАгроҚаржы» бағдарламалары арқылы шаруаларға жеңілдетілген шарттармен заманауи техника алу мүмкіндігі беріліп отыр. Бұл өз кезегінде еңбек өнімділігін арттырып, шығындарды азайтуға, сондай-ақ ауыл шаруашылығы өндірісінің бәсекеге қабілеттілігін күшейтуге ықпал етеді.
Көктемгі егіс науқаны барысында агротехникалық талаптарды сақтау мәселесі де басты назарда. Биыл егістік алқаптарға 25 мың тонна тыңайтқыш енгізіліп, отандық өндірушілермен тұрақты жеткізу жүйесі қалыптасқан. Сонымен қатар шаруаларды жанар-жағармаймен қамтамасыз ету бағытында да нақты жұмыстар атқарылуда. Жеңілдетілген бағамен бөлінген 15 мың тонна дизель отынының 6 мың тоннасы шаруаларға жеткізіліп, оның бір литрі 280–281 теңге көлемінде ұсынылуда. Бұл – нарықтағы бағадан төмен көрсеткіш, демек, шаруалар үшін айтарлықтай қолдау.
Мемлекеттік бағдарламалардың да аграрлық секторды дамытудағы маңызы зор. Соның ішінде «Кең Дала» бағдарламасы аясында 1 196 жоба қаржыландырылып, ауыл шаруашылығы тауар өндірушілеріне нақты қолдау көрсетілген. Бұл қаржылай көмек шаруалардың өндірістік әлеуетін арттырып, жаңа технологияларды енгізуге, сондай-ақ өнім көлемін ұлғайтуға мүмкіндік береді.
ТҮРКІСТАН ОБЛЫСЫНДА 223 ЖАҢА АУЫЛ ШАРУАШЫЛЫҒЫ ТЕХНИКАСЫ САТЫП АЛЫНДЫ
Сонымен қатар Түркістан облысы ерте пісетін өнімдер өндіруде республика бойынша алдыңғы қатардан көрініп отыр. Мақтаарал және Жетісай аудандарының шаруалары көктемгі алғашқы өнімдерін нарыққа шығарып үлгерді. Бүгінде бұл өңірлерде 300 тоннаға жуық қырыққабат жиналып, сатылымға ұсынылған. Қазіргі таңда өнімнің бір келісі 100–130 теңге аралығында саудалануда. Бұл – өңірдің табиғи-климаттық ерекшеліктерін тиімді пайдаланып, ауыл шаруашылығын әртараптандыру бағытында нәтижелі жұмыс жүргізіліп жатқанын көрсетеді.
Жалпы алғанда, Түркістан облысында аграрлық секторды дамытуға бағытталған кешенді шаралар өз нәтижесін беріп отыр. Техника паркін жаңарту, мемлекеттік қолдау тетіктерін тиімді пайдалану, агротехнологияларды енгізу және еңбек өнімділігін арттыру – өңірдің ауыл шаруашылығы саласын жаңа деңгейге көтеруде. Алдағы уақытта да бұл бағыттағы жұмыстар жалғасып, Түркістан облысының агроөнеркәсіптік кешені еліміздің азық-түлік қауіпсіздігін қамтамасыз етуде маңызды рөл атқара беретіні сөзсіз.