Созақ ауданында пробация қызметінің есебінде тұрған азаматтарды қоғамға қайта бейімдеу, оларды жұмыспен қамту және әлеуметтік қолдау көрсету мәселелеріне арналған маңызды жиын өтті. Басқосу аудандық прокуратураның бастамасымен аудан әкімдігінің мәжіліс залында ұйымдастырылып, салааралық өзара іс-қимылды күшейтуге бағытталды.
Жиынға аудан әкімінің орынбасары Серік Маманов, аудан прокурорының міндетін атқарушы Асылбек Туршеков, аудандық полиция бөлімінің пробация қызметі өкілдері, тиісті бөлім басшылары, ауылдық округтер мен кент әкімдері, сондай-ақ құқық қорғау органдарының қызметкерлері қатысты. Кездесудің негізгі мақсаты – пробация есебіндегі азаматтардың қоғамға бейімделуіне жағдай жасау және қайта қылмыс жасау қаупінің алдын алу.
Жиынды ашқан аудан әкімінің орынбасары Серік Сахиұлы бұл бағыттағы жұмыстардың әлеуметтік маңызы зор екенін атап өтіп, мемлекет тарапынан көрсетіліп жатқан қолдаулардың тиімді жүзеге асырылуы қажет екенін жеткізді. Оның айтуынша, пробация жүйесінің басты міндеті – жазаны өтеушілерді тек бақылау емес, оларды қоғамның толыққанды мүшесі ретінде қайта қалыптастыру.
Күн тәртібіндегі мәселе бойынша аудандық прокуратураның өкілі Руслан Айдарбеков пен аудандық полиция бөлімінің пробация бөлімшесінің басшысы Ақерке Кәдірбекова баяндама жасап, атқарылып жатқан жұмыстар мен кездесіп отырған өзекті мәселелерге тоқталды. Баяндамалар барысында пробация есебіндегі азаматтарды жұмыспен қамту, әлеуметтік жағдайын жақсарту және құқықтық түсіндіру жұмыстарының нәтижелері айтылды.
Аудан прокурорының міндетін атқарушы Асылбек Сламбекұлы пробация жүйесінің қоғам үшін маңызын ерекше атап өтіп, бұл бағыттағы жұмыстардың жүйелі жүргізілуі қайта құқық бұзушылықтың алдын алуда шешуші рөл атқаратынын жеткізді. Оның айтуынша, пробация есебіндегі азаматтарға тек бақылау жүргізу емес, оларды әлеуметтік ортаға бейімдеу – басты міндеттердің бірі.
Жиын барысында пробация есебіндегі азаматтар мен шартты түрде мерзімінен бұрын босатылған тұлғалардың қайта қылмысқа бармауы үшін нақты алдын алу шаралары талқыланды. Олардың ішінде тұрақты жұмысқа орналастыру, кәсіптік оқытуға тарту, әлеуметтік қолдау көрсету және психологиялық бейімдеу жұмыстарын күшейту мәселелері қаралды.
Сонымен қатар қатысушылар салааралық мекемелердің өзара іс-қимылын арттыру қажеттігін атап өтті. Ауылдық округ әкімдіктері, пробация қызметі, жұмыспен қамту орталықтары және құқық қорғау органдары арасындағы байланыс нығайтылып, әрбір азаматпен жеке жұмыс жүргізу тетіктері ұсынылды.
Жиын қорытындысында пробация есебіндегі азаматтарды қоғамға бейімдеу жұмыстарының тиімділігін арттыруға бағытталған нақты міндеттер айқындалды. Атап айтқанда, әрбір азаматтың әлеуметтік жағдайын жеке зерделеу, оларды тұрақты жұмыспен қамтуға ықпал ету және қайта қылмысқа жол бермеу бойынша кешенді шаралар қабылдау қажеттігі айтылды.
Мұндай кездесулер қоғам қауіпсіздігін қамтамасыз етуге, азаматтардың құқықтық мәдениетін арттыруға және әлеуметтік тұрақтылықты нығайтуға бағытталған маңызды қадам ретінде бағаланып отыр.