Сайрам ауданында тұрғындардың қаржылық сауаттылығын арттыру және құқықтық қолдау көрсетуге бағытталған кешенді ақпараттық-түсіндіру іс-шарасы өтті. Жоба аясында азаматтарға қаржылық қауіпсіздік, борыштық міндеттемелер және заңдық мәселелер бойынша кәсіби кеңестер берілді. Қазіргі таңда қаржылық сауаттылық – қоғам тұрақтылығы мен азаматтардың әлеуметтік әл-ауқатын айқындайтын маңызды факторлардың бірі. Әсіресе цифрландыру үдерісі қарқын алған кезеңде қаржыны тиімді басқару, несие шарттарын дұрыс түсіну және қаржылық тәуекелдердің алдын алу әрбір азамат үшін аса өзекті мәселеге айналып отыр.
Осыған байланысты Сайрам ауданында «Қаржылық сауаттылықты арттыру және борышкерлерге құқықтық қолдау көрсету» жобасы аясында кең көлемді түсіндіру жұмыстары ұйымдастырылды. Іс-шараның негізгі мақсаты – тұрғындарға қаржылық қиындықтарды заң аясында шешудің жолдарын түсіндіру, құқықтық сауатты арттыру және әлеуметтік жауапкершілікті қалыптастыру. Кездесу барысында қатысушыларға жеке қаржыны басқару, отбасылық бюджетті жоспарлау, банк өнімдерін тиімді пайдалану, несиелік міндеттемелерді сауатты орындау, қаржылық алаяқтықтан сақтану, сондай-ақ ойынқұмарлықтың алдын алу бағытында кеңінен ақпарат берілді. Сонымен қатар азаматтарға есеп-шоттарды бұғаттан шығару тетіктері, борыштық дауларды реттеу, төлем қабілетін бағалау және несиелік жүктемені азайту бойынша нақты практикалық кеңестер ұсынылды. Іс-шараға арнайы шақырылған білікті мамандар өз салалары бойынша мазмұнды баяндама жасап, тұрғындардың сауалдарына жауап берді. Атап айтқанда, «Қарызсыз қоғам» жобасының Түркістан облысы бойынша үйлестірушісі, заңгер Жандос Әзімбай қаржылық жауапкершілік пен құқықтық тетіктер жөнінде түсіндірсе, “Бәйтерек” жастар ұйымы” қоғамдық бірлестігінің төрағасы, заңгер-кеңесші Ролан Қонысбеков азаматтардың құқықтық қорғалу мәселелеріне тоқталды. Ал PhD доктор, доцент, психолог Салтанат Асанова қаржылық күйзеліс пен психологиялық тұрақтылық тақырыбында пайдалы кеңестерімен бөлісті. Мамандар қаржылық сауаттылықты ерте жастан қалыптастыру – болашақта әлеуметтік мәселелердің алдын алудың тиімді жолы екенін атап өтті. Сондай-ақ тұрғындарды жауапты қаржылық шешім қабылдауға, заң талаптарын сақтауға және жеке қаржыны тиімді басқаруға шақырды.