Түркістан облысы әкімінің орынбасары Қанат Қайыпбек Ордабасы ауданына арнайы жұмыс сапарымен барып, өңірде жүзеге асырылып жатқан инвестициялық жобалардың барысымен танысты. Жұмыс сапары барысында өндірістік нысандар араланып, құрылыс жұмыстарының қарқыны мен жобалардың іске асырылу деңгейі сараланды.
Соңғы жылдары Түркістан облысында өнеркәсіп пен кәсіпкерлікті дамыту бағытында жүйелі жұмыстар жүргізіліп келеді. Соның ішінде Ордабасы ауданы өндірістік әлеуеті жоғары аймақтардың біріне айналып отыр. Мұнда жаңа кәсіпорындар ашылып, өндіріс орындары іске қосылуда. Бұл өз кезегінде аудан экономикасының дамуына, жаңа жұмыс орындарының құрылуына және халықтың әл-ауқатының артуына мүмкіндік беруде.
Жұмыс сапары барысында облыс әкімінің орынбасары Central Asia Aluminum Company жауапкершілігі шектеулі серіктестігінің алюминий профильдерін шығаратын зауытының жұмысымен танысты. Аталған кәсіпорын құрылыс саласына қажетті алюминий өнімдерін өндіруге маманданған. Жоба отандық нарықты сапалы әрі қолжетімді өніммен қамтамасыз етуге бағытталған. Сонымен қатар кәсіпорын импорт көлемін азайтып, жергілікті өндірістің үлесін арттыруға ықпал етеді деп күтілуде.
Өңірдегі ірі жобалардың бірі – HUATING BIOTECHNOLOGY Co., LTD компаниясының ірі қара мал сүйегін өңдеу жобасы. Қазіргі таңда нысанның құрылыс жұмыстары қарқынды жүргізілуде. Жоба аясында мал сүйегінен түрлі биологиялық өнімдер өндіру көзделген. Бұл бастама қалдықсыз өндіріс қағидатына негізделіп, экологиялық тиімділікке басымдық береді. Сонымен бірге ауыл шаруашылығы өнімдерін терең өңдеу арқылы қосымша экономикалық құн қалыптастыруға мүмкіндік жасайды.
Сапар барысында KAZ KIOTI серіктестігінің өндірістік базасы да таныстырылды. Кәсіпорында ауыл шаруашылығы техникаларын құрастыру жұмыстары жолға қойылған. Мұнда тракторлар шығарылып қана қоймай, су үнемдеу технологиялары негізінде жаңбырлатып суару қондырғылары өндірілуде. Бұл өнімдер еліміздің аграрлық саласында су ресурстарын тиімді пайдалануға мүмкіндік береді.
Сонымен қатар кәсіпорында жоғары қысымды температурада шыны өңдеу, ауыл шаруашылығы мен құрылыс саласына қажетті өзге де өнімдер шығару ісі қолға алынған. Мұндай жобалар ауданның өндірістік әлеуетін арттырып, технологиялық даму деңгейін көтеруге ықпал етуде.
Темірлан өндірістік паркі аумағында да құрылыс жұмыстары қарқынды жүргізіліп жатыр. Өндірістік парк аумағында бірнеше инвестициялық жоба қатар жүзеге асырылуда. Атап айтқанда, ASIA ENERGY Co күн панельдеріне арналған бөлшектер өндіру жобасын қолға алған. Бұл жоба жаңартылатын энергия көздерін дамытуға бағытталған маңызды бастамалардың бірі саналады.
Сондай-ақ FAÇADE COMPANY шыны өнімдерін өндіру жобасын жүзеге асырып жатса, ALMEN GROUP кір жуғыш ұнтақ шығаруды қолға алған. Ал Қарабатыр Агро металл бұйымдарын өндіру бағытында жұмыс жүргізуде.
Өндірістік парк аумағында бұдан өзге де ауқымды жобалар іске асырылып жатыр. Атап айтқанда, Югстройтехнология газобетон блоктары мен ішкі қабырға плиталарын шығаруды жоспарласа, Alem Euro PIR заманауи сэндвич панельдер өндірісін іске қоспақ. Сонымен қатар Steel Frame металл конструкцияларын өндіру жобасын жүзеге асырып жатыр. Ал Bolashak-bal корпус жиһаздарын шығару ісін қолға алған.
Өңірде өндірістік жобалармен қатар кәсіпкерлік бағыттағы бастамалар да белсенді жүзеге асырылуда. Аудан аумағында жол бойы сервистік қызмет көрсету нысандары мен қоғамдық тамақтану орындары ашылып жатыр. Атап айтқанда, жеке кәсіпкер Смайылдың бастамасымен тамақтану орны, автосервис және тұрақ аймағы бар кешен салынуда. Сонымен бірге M Trade–19 жол бойы сервис орталығын іске асыруда. Бұдан бөлек, кәсіпкер Ә. Әлімбековтің мейрамханасы мен «Темірші» демалыс аймағы халық игілігіне берілмек.
Жұмыс сапары қорытындысында Қанат Қайыпбек жүзеге асырылып жатқан жобалардың өңір экономикасын дамытудағы маңызы ерекше екенін атап өтті. Оның айтуынша, мұндай инвестициялық бастамалар жаңа жұмыс орындарын ашуға, өндіріс көлемін арттыруға және ауданның әлеуметтік-экономикалық әлеуетін нығайтуға мүмкіндік береді. Сонымен қатар барлық жобалардың сапалы әрі белгіленген мерзімде іске асырылуы қатаң бақылауда болуы тиіс екенін жеткізді.
Бүгінде Ордабасы ауданында жүзеге асырылып жатқан инвестициялық жобалар өңірдің өндірістік қуатын арттырып қана қоймай, Түркістан облысының экономикалық дамуына тың серпін беруде. Жаңа кәсіпорындардың ашылуы, заманауи технологиялардың енгізілуі және кәсіпкерлік белсенділіктің артуы ауданның болашағына деген сенімді күшейтіп отыр.