Түркістанда жол-көлік инфрақұрылымын жаңғырту жұмыстары қарқын алды

Соңғы жылдары Түркістан қаласының қарқынды дамуы, халық санының өсуі және туристік әлеуетінің артуы көлік инфрақұрылымын жаңартуды талап етіп отыр. Осыған байланысты шаһарда жаңа жолдар салу, ескі көшелерді қайта жөндеу, жаяу жүргіншілер мен велосипед жүргізушілеріне қолайлы орта қалыптастыру бағытында кешенді жұмыстар қолға алынған.

Қазіргі таңда қаладағы негізгі көшелердің бірі саналатын Б.Майлин көшесінде реконструкция жұмыстары қарқынды жүргізілуде. Жалпы ұзындығы 1,98 шақырымды құрайтын көшеде құрылыс-монтаж жұмыстары басталып, бүгінгі күні жобаның орындалу деңгейі 30 пайызға жеткен.

Жоба аясында жол толықтай жаңартылып, төрт жолақты асфальт жабыны төселеді. Сонымен қатар заманауи талаптарға сай аяқжолдар, веложолақтар, суағар жүйелері мен көше жарықтары орнатылады. Мамандардың айтуынша, бұл жұмыстар көлік қозғалысының қауіпсіздігін арттырып, қала тұрғындарына қолайлы орта қалыптастыруға мүмкіндік береді.

Сонымен бірге Түркістан қаласындағы Ә.Жангелдин көшесінде де ауқымды жол құрылысы жүзеге асырылып жатыр. Жалпы ұзындығы 600 метрді құрайтын көшенің 400 метр бөлігінде негізгі құрылыс жұмыстары аяқталған. Атап айтқанда, жолдың негізі дайындалып, жиектастар орнатылған, суағар науалар салынған, жарықшам бағаналары қойылған. Сондай-ақ жаяу жүргіншілер жолы мен веложол құрылысы толық аяқталған.

Қазіргі таңда бұл аумақта асфальт төсеу жұмыстары жүргізілуде. Жоба аяқталған соң көше заманауи үлгіде жаңарып, тұрғындар үшін қауіпсіз әрі қолайлы көлік қозғалысы қамтамасыз етіледі деп күтілуде.

Қаладағы маңызды инфрақұрылымдық жобалардың бірі – Сығанақ көшесін жаңарту жұмыстары. Ұзындығы 3 шақырымды құрайтын көшеде жол жабынын жаңарту және абаттандыру жұмыстары кезең-кезеңімен іске асырылып жатыр.

Бүгінде жолдың ескі асфальт қабатын фрезалау жұмыстары толық аяқталған. Қазіргі уақытта мамандар аяқжол салу жұмыстарын жүргізуде. Сонымен қатар жол бойындағы инфрақұрылым нысандарын жаңарту, қауіпсіздік талаптарына сай жол белгілерін орнату және көше жарықтарын ретке келтіру шаралары қатар атқарылуда.

Жауапты мамандардың мәліметінше, Сығанақ көшесіндегі асфальт төсеу жұмыстарын мамыр айының алғашқы онкүндігінде толық аяқтау жоспарланып отыр. Бұл жұмыстар аяқталғаннан кейін жолдың сапасы жақсарып, көлік қозғалысы анағұрлым жеңілдей түседі.

Мамандардың айтуынша, Түркістан қаласында жүргізіліп жатқан жол құрылысы мен реконструкция жұмыстары тек көлік қозғалысын реттеуге ғана емес, шаһардың сәулеттік келбетін жақсартуға да бағытталған. Жаңа жолдар мен заманауи инфрақұрылым қаланың туристік тартымдылығын арттырып, тұрғындардың өмір сапасын жақсартуға ықпал етеді.

Соңғы жылдары Түркістан еліміздегі қарқынды дамып келе жатқан қалалардың біріне айналды. Қалада жаңа тұрғын үйлер, әлеуметтік нысандар, туристік кешендер мен мәдени орталықтар бой көтеруде. Осыған байланысты көлік инфрақұрылымын дамыту мәселесі басты назарға алынған.

Сарапшылардың пікірінше, сапалы жол инфрақұрылымы – экономикалық дамудың маңызды көрсеткіштерінің бірі. Жолдардың жаңаруы кәсіпкерліктің дамуына, туристер ағынының көбеюіне және көлік қатынасының тиімділігін арттыруға мүмкіндік береді. Сонымен қатар бұл жұмыстар жол-көлік оқиғаларының азаюына және экологиялық ахуалдың жақсаруына да оң әсер етеді.