Түркістан облысында су ресурстарын тиімді пайдалану және ауыл шаруашылығы өндірісін тұрақты дамыту бағытында жүйелі жұмыстар жүргізілуде. Өңірде су үнемдеу технологияларын енгізу қарқыны артып, мыңнан астам шаруа қожалығы заманауи әдістерге көшіп үлгерді.
Облыс әкімінің орынбасары Нұрбол Тұрашбековтің төрағалығымен өткен мәжілісте суғару маусымының барысы, ағын суды бөлу және шаруашылықтарды қамтамасыз ету мәселелері жан-жақты қаралды. Жиында жауапты басқарма өкілдері мен аудан әкімдіктері атқарылып жатқан жұмыстар бойынша есеп берді.
Шардара су қоймасынан Шардара, Отырар және Арыс аудандарының жалпы 74,7 мың гектар егістік жері суарылады. Бүгінгі күнге дейін су қоймасынан 448,3 млн текше метр су босатылған. Ал «Достық» магистральді каналы арқылы Мақтаарал мен Жетісай аудандарының шаруаларына 484,5 млн текше метр ағын су жеткізілген.
Сонымен қатар «Зах», «Ханым» және «Үлкен Келес» су арналары арқылы Қазығұрт, Сарыағаш және Келес аудандарындағы 4251 шаруа қожалығы ағын сумен қамтылып отыр. Су бөлу жұмыстары аудандарда алдын ала бекітілген кезектілік кестесіне сәйкес жүргізілуде.
Өңірде су үнемдеу технологияларын енгізу жұмыстары да қарқын алған. Бүгінде 1083 шаруа қожалығының егістік алқаптары тамшылатып суғару және басқа да заманауи жүйелерге көшірілген. Қосымша 328 шаруа қожалығы тиісті құжаттарын рәсімдеп, су үнемдеу жабдықтарын жеткізуші кәсіпорындармен келісімшарт жасау үстінде.
Мамандардың айтуынша, шаруалардың мұндай технологияларға бет бұруы су шығынын азайтып қана қоймай, өнімділікті арттыруға да мүмкіндік береді. Су тапшылығы қаупі күшейіп отырған кезеңде бұл ауыл шаруашылығы үшін стратегиялық маңызды бағыттардың бірі болып отыр.
Облыс әкімінің орынбасары су ресурстарын пайдалану тәртібін қатаң бақылауда ұстау қажеттігін атап өтіп, тиісті мамандарға нақты тапсырмалар жүктеді. Ағын суды бөлу кезінде әділдік пен мерзімнің сақталуы басты талап ретінде белгіленді.
Айта кету керек, Түркістан облысында су үнемдеу технологияларын енгізу көлемін 164 мың гектарға дейін жеткізу жоспарланған. Бұл бағыттағы жұмыстар кезең-кезеңімен жүзеге асырылып, ауыл шаруашылығының тұрақты дамуына жағдай жасалмақ.