Түркістанда жазушы Саттар Ерубаевтың туғанына 110 жыл толуына орай «Ұлы даланың жас Алашы» атты ұлттық-танымдық кеш өтті. Жиын облыстық тарихи-өлкетану музейінің және Саттар Ерубаев музей-филиалы мен қалалық Мәдениет үйінің бірлесуімен ұйымдастырылған. Танымдық кешке зиялы қауым өкілдері мен мұражай қызметкерлері қатысты. Шарада небәрі 23 жыл ғана ғұмыр кешіп, өшпес мұра қалдырған талант иесі көпшілікке кеңінен таныстырылды.
Сонымен қатар, басқосуда қаладағы Саттар Ерубаев атындағы №7 мектеп-интернатының оқушылары қаламгер шығармаларынан үзінді оқыды. Ал қалалық Мәдениет үйінің «Шұғыла» халықтық мәдени-үгіт ұжымы көрерменге «Шындық пен шығарма» танымдық қойылымын сахналады. Одан бөлек, көңіл тебірентер күйлер шертіліп, әндер шырқалды.
Айта кетсек, Саттар Ерубаев — Қазақстан жастарының «Ленин комсомолы» сыйлығын алғаш иеленген ұлағатты тұлға. Оның атына 1989 жылы Түркістанда мемориалдық музей ашылып, 1995 жылы Саттар Ерубаевтың әдеби-мәдени музейі болып қайта құрылған.
1935 жылы Ерубаев Қазақстан журналистері 1-съезінің ұйымдастырушыларының бірі болды. Сонымен қоса аудармашылықпен де шұғылданды. Ол К.Чуковскийдің, Ю.Березиннің, А.Суриковтың, И.Эренбургтің кейбір шығармаларын қазақ тіліне аударған.
Саттар Асқарұлы «Үш шахтер туралы баллада», «Меруерт алқа» балладалардың, «Бақыт», «Өмір көркемдігі» новеллаларының авторы. «Менің құрдастарым» романында Қазақстанның көмір орталығы Қарағандыны кұрушы жастардың тұрмысы мен еңбегін суреттейді.
Талантты жазушы және журналистке 1966 жылы Қазақстан Ленин комсомолы атындағы сыйлық берілді.
1989 жылы Түркістанда мемориалдық музей ашылып, 1995 жылы Саттар Ерубаевтың әдеби-мәдени музейі болып қайта құрылды.