ТҮРКІСТАН: БӘЙДІБЕК АУДАНЫНДА ҮСТЕЛ ТЕННИСІНЕН ЖАРЫС ӨТТІ

Биыл елімізде мәслихаттардың құрылғанына 30 жыл толып отыр. Бәйдібек ауданында кең көлемде атап өту мақсатында мәслихат аппаратымен 30 игі іс-шара жоспары бекітілген.
Бекітілген жоспарға сәйкес, Шаян ауылында орай, «Спорт – жан серігі» атты үстел теннисінен аудандық жарыс өтті. Жарыстың ашылуына Бәйдібек ауданының мәслихат төрағасы Имангелді Түймебаев, аудан әкімінің орынбасары Бағдатбек Жанғазиев, ардагер спортшы Ағабек Атемов қатысты. Құттықтау тілектерін білдіріп, спортшыларға сәттілік тіледі.
Жарысқа 11 ауылдық округтен ересектер мен жасөспірімдер арасында жалпы 38 спортшы қатысты. Нәтижесінде ұлдар арасында І орынды Алғабас ауылдық округінен Санақ Дулат, ІІ орынды Мыңбұлақ ауылдық округінен Амангелді Әділмұрат, ІІІ орынды Жамбыл ауылдық округінен Жұмаш Нұрдәулет иеленді. Ал қыздар арасынан Шаяндықтар Бимырза Нұрай І орынды, ІІ орынды Рауанқызы Аида, ІІІ орынды ақбастаулық Махан Аружан жеңіп алды. Қатысқан спортшылардың ішінен Жамбыл ауылдық округінен Ойнар Айсұлу, Ағыбеттен Жүсіп Қарақат, Ақбастаудан Асқар Сағиұлы және Бөген ауылдық округінен Досалы Нұрбол үздік деп танылды. Жүлделі орындарды иеленген спортшыларға аудандық мәслихат төрағасының арнайы диплом, медаль және естелік сыйлықтары табыс етілді.
Ал Түркістан облысы, Созақ ауданы, Шолаққорған ауылындағы Жібек жолы-2 көшесінің бойынан 1 маусым – Халықаралық балаларды қорғау күні мерекесі қарсаңында «Katco» қазақ-француз біріккен кәсіпорнының демеушілігімен салынған кіші футбол алаңы мен балалар ойын алаңшасы пайдалануға берілді.
Спорт нысанының ашылу салтанатында аудан әкімі Мұхит Тұрысбеков шараға жиналған тұрғындарды жаңа нысанның ашылуымен құттықтап, жас бүлдіршіндерге мерекелік тілегін арнады. Сонымен қатар аудандық мәслихат төрағасы Ордабек Жәмиев ауыл жастары спортты жанына серік етіп, жаңа нысан тәнін шынықтыратын орынға айналатынына сенімін білдірді.
Шолаққорған ауылдық ардагерлер кеңесінің төрағасы, Созақ ауданының Құрметті азаматы Бүркіт Арынбеков аудан көлемінде түрлі сала бойынша атқарылып жатқан жұмысарға тоқталып, ізгі тілегін арнады. Спорт ардагері, ауыл қариясы Талымов Жолдасбек игі істі атқарған азаматтар мен нысанға демеушілік танытқан «Katco» қазақ-француз біріккен кәсіпорнына алғыс айтып, батасын берді.