Тайван мемлекетінің астанасы Тайпэй қаласында мамыр айының 25-29 күндері гір көтеруден Азия чемпионаты өтті. Онда шардаралық спортшылар серпе көтеру, жұлқа көтеру және ұзақ айналым бойынша сынға түсіп 7 алтынды қоржынға салды.
Жасөспірімдер арасында серпе көтеруден 53 келіде Мадияр Байдуллаев, 58 келіге дейінгілер арасында Елнұр Елемес және 68 келіде Оразхан Ережеп алтыннан алқа тақты. Ал жұлқа көтеруден 53 келіде Бейбарыс Есмағаев жеңімпаз атанса, 58 келідегі Тастан Қуаныш пен 73 келідегі Аман Жандарбек жеңісті жолды жалғады. Сондай-ақ жастар арасында 95 келі салмақта Асылбек Амандық жұлқа көтеруден Азия чемпионы атанды.
«Түркістан — Түркі әлемінің туризм астанасы» атануы аясында қала тұрғындарымен мен спортшылар арасында веломарафон өтті. Жарыстың ашылуында алғы сөз сөйлеген қала әкімінің орынбасары Мекенхан Қырықбаев қатысушыларға сәттілік тіледі.
Түркістан қалалық әкімдігінің ұйымдастыруымен өткен додада жалпы саны 70-ке жуық адам бақ сынады. Шабандоздар «Түркістан Арена» стадионынан бастап, «Денсаулық» саябағына дейін 7 шақырым жолды жүріп өтті. Жүлдегерлерге қала әкімінің арнайы алғыс хаттары мен сыйлықтары табысталды. Түркістан облысында «ZHAS PROJECT» жобасының жеңімпаздары анықталды. Әлеуметтік жобаға өңірдің барлық аудан-қалаларынан 500-ден астам жас қатысып, өз жобаларын ұсынған. Оның ішіне 225 жоба талапқа сай деп танылған. Бұл жайында Түркістан облысы бойынша «ZHAS PROJECT» жобасының менторы Сая Сағынғалиева брифингте мәлімдеді.
«Іріктеу кезеңінен өткен жастар 3 күндік онлайн семинар-тренинг оқуынан өтті. Соңғы комиссия отырысында 129 қатысушы өз жобасын қорғап, 20 жоба грант иегері атанды. Үздік деп танылған жастарға кәсібін бастау үшін 1 миллион теңге көлемінде қаржы беріледі. «Zhas project» жобасының негізгі мақсаты – жастардың мүмкіндігін арттыруға бағытталған. Жобаға қатысушылар өз аймағындағы әлеуметтік мәселелерді шешуге бағытталған тиімді бастамаларды жүзеге асырып, сонымен қатар көшбасшылық қабілетін де дамыта алады»- деді спикер.
Сондай-ақ, бұл 18 жастан 35 жасқа дейінгі және NEET санатындағы жастардың әлеуметтік жобаларды іске асыруына бағытталған.
ТҮРКІСТАН: ШАРДАРАЛЫҚ СПОРТШЫЛАР ГІР КӨТЕРУДЕН АЗИЯ ЧЕМПИОНАТЫНДА 7 АЛТЫН МЕДАЛЬ АЛДЫ
