Түркістан облысында су нысандары мен шомылу орындарында қауіпсіздік шаралары күшейтілген. Осы ретте балалардың қауіпсіздігін сақтау бағытында құзырлы органдармен облыстың барлық аудан, қалаларында ата-аналармен жергілікті жерлерде кездесулер ұйымдастырылып, барынша түсіндіру жұмыстары жүргізілуде.
Жыл басынан бері құзырлы органдармен кезекшіліктер бекітіліп, 4685 адамды тарта отырып, 2229 патрульдеу және рейд жұмыстары ұйымдастырылып, өзендер мен каналдардың бойында орналасқан 4000-ға жуық тұрғын үйлерді аралау арқылы түсіндірме жұмыстары жүргізіліп, жадынамалар таратылды. Үлкендердің қарауынсыз жүрген 100-ден аса бала ата-аналарына тапсырылды. Қайғылы оқиғалардың көбісі балалардың ата-ананың қарауынсыз қалуынан болып жатқандықтан, құзырлы органдармен облысымыздың барлық аудан, қалаларына бару арқылы ата-аналармен жергілікті жерлерде кездесулер ұйымдастырылып, барынша түсіндіру жұмыстары жүргізіліп жатыр. Мектеп директорларымен судағы қауіпсіздік бойынша семинарлар мен 244 ашық сабақтар өткізілді. Барлық мектептердің әр сыныптарында «Судағы қауіпсіздік ережелері» бойынша диктант жаздырылды және 2013 арнайы қауіпсіздік бұрыштары орнатылды.
Облыс аумағындағы судағы қауіпсіздік бойынша үгіт-насихат жұмыстары кеңінен қарқынды жүргізілуде. Аудан және қалаларда 65 баннерлер, 47 билбордтар орнатылды, 30254 дана жадынама таратылып 12 мыңнан аса адамның қатысуымен 997 рет халықпен кездесулер өткізілді.
Биылғы жылы судағы қауіпсіздік бойынша үгіт-насихат жұмыстарын жүргізуге 580 ерікті тартылып, жұмыспен қамту орталығынан 127 адам жұмысқа қабылданды.
Одан бөлек, арнайы және ресми халықтың шомылатын орындары жоқ елдімекендерде модульді-каркасты бассейіндер жергілікті әкімдік тарапынан және кәсіпкерлер есебінен сатып алынып, тегін және қауіпсіз шомылуына мүмкіндіктер жасалынуда. Өңірде жыл басынан бері 80 дана қаркасты бассейн сатып алынып, орнатылды. Қазіргі таңда жалпы каркасты бассейндер саны 151-ге жетіп отыр.
Әлеуметтік жағдайы төмен, көпбалалы отбасылардың балаларын тегін шомылдыру бойынша, бүгінгі таңда 51 меморандум түзіліп, 600-ден астам баланы тегін шомылдыру жұмыстары жүргізіліп, арнайы су кешендерінде 2500 мыңнан астам жасөспірім балаларды жүзуге және шомылуға үйрету жұмыстары жүргізілген.
Облыс аумағында шомылуға арналған 27 орынның 15-і жұмысын бастап кетті. Қосымша коммуналдық жағажайлар ашу үшін Арыс ауданында 2, Ордабасы ауданында 9, Сауран ауданында 2 орын анықталып, су айдынының түбін зерделеу, тазалау жұмыстары жүргізілді. Нәтижесінде, Арыс қаласында коммуналдық жағажайлар ашылды.
ТҮРКІСТАН ОБЛЫСЫНДА СУҒА ШОМЫЛУ МАУСЫМЫНДАҒЫ ҚАУІПСІЗДІК ШАРАЛАРЫ КҮШЕЙТІЛДІ
