Сарыағаш ауданында жастар арасындағы жұмыссыздық деңгейін төмендету, колледж бітіруші түлектеріне мемлекеттік бағдарламалармен таныстыру, жастар практикасы арқылы жұмысқа орналасуға ықпал ету және оларды Отан алдындағы азаматтық борышын өтеуге үндеу мақсатында бірқатар шаралар жүзеге асырылуда. Осы бағытта аудан әкімінің орынбасары А.Қозыбаевтың тапсырмасына сәйкес «Жас түлек» ақпараттық керуені атты мобильді топтың жұмыс кестесі бекітіліп, жүйелі жұмыстар жүргізілуде. Мобильді топтың жетекшісі – Сарыағаш аудандық жастар ресурстық орталығының басшысы Н.Отаров. Топ құрамына Мансап орталығының мамандары, Қорғаныс істері жөніндегі бөлім қызметкерлері енгізілді.
Жұмыс кестесіне сәйкес мобильді топ Қапланбек жоғары аграрлық-техникалық колледжі, №12 колледж, және Абу Али Ибн Сина жоғары медициналық колледжінің бітіруші түлектерімен кездесу өткізді. Іс-шара барысында ҚР «Еңбек нарығын дамытудың 2024–2029 жылдарға арналған тұжырымдамасы» аясында мемлекеттік қолдау тетіктері, жастарға арналған түрлі бағдарламалар – «Жастар практикасы», «Ақылы қоғамдық жұмыс», «Серпін-2050», «Жасыл ел», «Бастау бизнес» жобалары бойынша кең көлемде түсіндірме жұмыстары жүргізілді.Сонымен қатар, Қарулы Күштер қатарындағы әскери қызметтің маңыздылығы мен азаматтық борышты өтеудің мағынасы да жастар назарына ұсынылды.
Кездесулер барысында түлектер мамандарға көкейлеріндегі сұрақтарын қойып, нақты әрі пайдалы жауаптар алды. Бұл шара түлектердің болашақ кәсіби бағытын дұрыс таңдауына, еңбек нарығында өз орнын табуына және әлеуметтік қолдау тетіктерін тиімді пайдалануына айтарлықтай септігін тигізді.
Айта кетсек, биыл Сарыағаш ауданындағы 6 колледжде 1005 түлек оқуын аяқтап, еңбек жолын бастағалы отыр.
САРЫАҒАШ: «ЖАС ТҮЛЕК» АҚПАРАТТЫҚ КЕРУЕНІНІҢ ЖҰМЫСЫ ҰЙЫМДАСТЫРЫЛДЫ
