Бүгін аудан әкімі Арман Абдуллаев Сарыағаш қаласында орналасқан пластик материалынан есік-терезе шығаратын жеке кәсіпкер Ерғали Омаровтың цехына арнайы барып, өндіріс орнымен танысты.
Нысанды аралау барысында аудан әкімі өндіріс процесін көріп, өнім сапасына жоғары баға берді. Кәсіпкермен сұхбат барысында Арман Абдуллаев цех ұжымына сәттілік тілеп, жергілікті өнімнің бәсекеге қабілеттілігін арттыру бойынша ұсыныстарын жеткізді.
-Кәсіпкерлікті дамыту — ауданымыздың басты басымдықтарының бірі. Осындай шағын және орта бизнес нысандарын қолдау арқылы біз экономиканы әртараптандырып, жаңа жұмыс орындарын ашуға жағдай жасаймыз,-деп аудан басшысы кәсіпкерлерді қолдауға әрқашан дайын екенін жеткізді.
Цех — жергілікті кәсіпкерлік субъектілерінің бірі ретінде аймақтың экономикалық әлеуетін арттыруға үлес қосып отырған өндірістік нысан. Мұнда қазіргі заманғы технологиялар негізінде жоғары сапалы пластик есік пен терезелер дайындалады. Цехта жергілікті 15 тұрғын жұмыс істейді. Тәулігіне қуаттылығы 12 тоннаны құрайды. Өнім Қазақстан республикасының аумағында ғана емес,Тәжікстан және Қырғызстан мемлекеттеріне де тасымалдануда.
Сарыағаш ауданының әкімі Арман Абдуллаев Құркелес ауылдық округінде орналасқан «Bah-Asmar» жауапкершілігі шектеулі серіктестігінің бір реттік ыдыс-аяқ шығаратын өндірістік цехын аралап көрді.
Аудан басшысы цехтың өндіріс процесімен танысып, қолданылып жатқан заманауи технологиялар мен өнім сапасына назар аударды.
Сұхбаттасу барысында цехтың директоры Ерлан Исаев аудан басшысына алдағы жоспарларын баяндады.
Арман Абдуллаев өз сөзінде:
-Мұндай кәсіпорындар – аудан экономикасының тірегі. Жергілікті өндірісті қолдау арқылы біз тұрғындарды жұмыспен қамтып, ішкі нарықты отандық өніммен қамтамасыз ете аламыз,– деп атап өтті.
Кәсіпорында бір реттік пластик және қағаз ыдыс-аяқтар шығарылып, жергілікті және аймақтық нарыққа жеткізілуде. Кәсіпорын тәулігіне 100 мың дана өнім шығарып,55 адам тұрақты жұмыспен қамтылған.
АРМАН АБДУЛЛАЕВ:КӘСІПКЕРЛЕРДІ ҚОЛДАУҒА ӘРҚАШАН ДАЙЫНБЫЗ!
