Түркістан – Қазақстанның жаңа инвестициялық циклінің драйвері
Түркістан облысында инвестиция тарту, өңір экономикасын әртараптандыру және өндірістік әлеуетті арттыру бағытында жүйелі жұмыстар жалғасып келеді. Осы мақсаттағы маңызды қадамдардың бірі – 2025 жылғы 24–25 қараша күндері Түркістан қаласында өткен TITF–2025 халықаралық инвестициялық-туристік форумы болды. Ауқымды басқосу өңірдің экономикалық дамуындағы жаңа кезеңнің бастауы ретінде бағаланып отыр.
Халықаралық алаң – жаңа мүмкіндіктер кеңістігі
TITF–2025 форумы отандық және шетелдік инвесторлар, халықаралық компаниялар, қаржы ұйымдары мен мемлекеттік органдар өкілдерін бір алаңға тоғыстырды. Форумның негізгі мақсаты – Түркістан облысының инвестициялық, өндірістік және туристік әлеуетін кеңінен таныстырып, нақты жобалар арқылы өңірге капитал тарту.
Форумға әлемдік деңгейдегі компания өкілдері мен отандық кәсіпкерлер қатысып, өндіріс, ауыл шаруашылығы, энергетика және туризм салаларындағы перспективалы жобалар ұсынылды.
Іс-шараны ұйымдастыруға Қазақстан Республикасының Қытай Халық Республикасындағы Сиань қаласындағы Бас консулдығы белсенді қолдау көрсетіп, халықаралық әріптестікті нығайтуға ықпал етті.
Қазақстан Республикасының Қытайдағы Бас консулы Қыраубаев Жошыхан Асылбекұлы Қытайдың Шэньси және Сычуань провинцияларынан келген ресми және бизнес делегациясын бастап келді. Бұл – Қазақстан мен Қытай арасындағы экономикалық байланыстардың жаңа деңгейге көтерілгенінің нақты көрінісі.
«Түркістан – жаңа инвестициялық циклдің драйвері»
Форум аясында «Түркістан – Қазақстанның жаңа инвестициялық циклінің драйвері» тақырыбында панельдік сессия өтті. Онда Түркістан облысының әкімі Нұралхан Көшеров сөз сөйлеп, өңірдің инвесторлар үшін ашық әрі қолайлы аймақ екенін атап өтті.
– Түркістан қаласында дәстүрлі түрде өтетін халықаралық форумға қош келдіңіздер! Бұл басқосу – өңір дамуына серпін беретін, өндіріс саласында тың жобаларды жүзеге асыруға мүмкіндік беретін іскерлік алаң. Біз инвесторлармен бірлесе жұмыс істеуге, экспорт көлемін ұлғайтуға және өнеркәсіпті дамытуға әрдайым дайынбыз. Бүгін мақұлданған жобалар аймақтың өндірістік әлеуетін жаңа деңгейге көтереді деп сенемін, – деді облыс басшысы.
432,2 млрд теңгеге 7 меморандум: нақты жобалар, нақты қадамдар
Форумның басты нәтижесі – жалпы құны 432,2 млрд теңгені құрайтын 7 ынтымақтастық меморандумына қол қойылуы. Бұл келісімдер өңір экономикасының негізгі салаларын қамтып отыр.
Атап айтқанда:
75,3 млрд теңгелік Қазақстан–Қытай индустриалды аймағын құру жобасы;
джинс матасын өндіру;
ілмек пен мата өндірісі;
халықаралық текстиль орталығын құру;
алюкацинк қағаздарын өндіру;
ауыл шаруашылығы өнімдерін өңдеу жобалары;
жарықтандыру жабдықтары мен күн панельдерін өндіру бағытындағы инвестициялық жобалар мақұлданды.
Бұл жобалар өңірде жаңа өндіріс орындарын ашуға, мыңдаған жұмыс орнын құруға және экспорттық әлеуетті арттыруға бағытталған.
Халықаралық ынтымақтастық – өңір дамуының негізі
Форум барысында халықаралық серіктестікті кеңейту мәселесіне ерекше назар аударылды. Жыл басынан бері Түркістан облысында:
90-нан астам шетелдік компаниямен келіссөздер жүргізілген;
Қытай Халық Республикасы, Иран және Өзбекстан елдеріне ресми сапарлар ұйымдастырылған.
Нәтижесінде арнайы экономикалық аймақтарда:
белсенді қоспалар мен дәрумендер өндірісі;
кеңселік қағаз шығару;
сэндвич-панельдер мен еден жабындарын өндіру;
тамшылатып суару жүйелері;
балыққа арналған құрама жем;
өсімдік майын өндіру жобаларын іске асыру жоспарланып отыр.
Экономикалық өсімнің жаңа кезеңі
Жыл сайын дәстүрлі түрде өтетін TITF форумы – ресми сапарлар мен келіссөздердің заңды жалғасы ретінде қалыптасқан беделді инвестициялық алаңға айналды. Мұнда мақұлданған жобалар Түркістан облысының өнеркәсіптік әлеуетін арттырып қана қоймай, өңірді Қазақстанның жетекші өндірістік орталықтарының біріне айналдыруға мүмкіндік береді.
TITF–2025 форумы – Түркістан облысының экономикалық дамуындағы стратегиялық маңызы бар кезең.
432,2 млрд теңгеге 7 меморандумға қол қойылуы – өңірге жаңа инвестициялар тартудың, өндіріс пен ауыл шаруашылығын дамытудың нақты бастамасы.
Жобалар толық іске асқан жағдайда:
жаңа жұмыс орындары ашылады;
экспорт көлемі ұлғаяды;
өңірдің әлеуметтік-экономикалық көрсеткіштері жақсарады.
Сонымен қатар, форум билік пен инвесторлар арасындағы сенімді нығайтып, халықаралық серіктестікті кеңейтуге жол ашты. Бұл – Түркістан облысын ұзақ мерзімді тұрақты даму жолына бастайтын маңызды қадам.