Қазіргі таңда мемлекеттік қызмет көрсету саласында тұрғындардың әлеуметтік мәселелерін дер кезінде анықтап, шешу ерекше маңызды. Азаматтарды жеке қабылдау — бұл мәселенің тиімді жолдарын табуда негізгі құралдардың бірі болып табылады.
Жеке қабылдау кезінде тұрғындар өздерін қызықтырған мәселелерді тікелей мамандарға жеткізеді. Бұл үдеріс тұрғындардың сенімін арттырып қана қоймай, әлеуметтік қолдаудың нақты шараларын уақытында қолдануға мүмкіндік береді. Азаматтарды жеке қабылдау барысында көбінесе келесі мәселелер қарастырылады: тұрғын үй, әлеуметтік төлемдер, зейнетақы мен мүгедектік бойынша жеңілдіктер, жұмыспен қамту мәселелері, сондай-ақ білім және денсаулық сақтау саласындағы сұрақтар.
Мемлекеттік қызметкерлер жеке қабылдауда әр тұрғынның мәселесін мұқият тыңдап, нақты шешімдер қабылдайды. Бұл әлеуметтік қолдаудың тиімділігін арттырып, тұрғындардың өмір сүру сапасын жақсартуға ықпал етеді. Сонымен қатар, жеке қабылдау тұрғындардың құқықтары мен мүдделерін қорғаудың маңызды тетігі болып табылады.
Осы орайда Түркістан облысы әкімдігінде бекітілген кестеге сәйкес азаматтарды жеке қабылдау тұрақты түрде жалғасуда. Бұл жұмыс тұрғындардың арыз-шағымын, ұсыныс-пікірін тікелей тыңдап, мәселелерді жедел шешуге бағытталған.
2025 жылғы 9 айдың қорытындысымен жеке қабылдауға 1 025 азамат жазылған. Жеке қабылдауға жазылған тұрғындарға 65 қабылдау ұйымдастырылып, онда 593 азаматтың өтініштері мен ұсыныс-пікірлері тыңдалды.
Жеке қабылдауда болған азаматтар тарапынан түрлі салаларға қатысты 600-ге жуық өтініш пен ұсыныс-пікірлер айтылды. Өтініш иелерінің басым бөлігі тұрғын үймен қамтамасыз ету, білім, инфрақұрылым, жер даулары, жұмыспен қамту, денсаулық сақтау салаларына қатысты мәселелерді жиі көтерген. Сонымен қатар тұрғындар мәдениет және спорт, ауыл шаруашылығы, кәсіпкерлік салаларына қатысты өтініштермен жүгінген. Әрбір азаматтың мәселесі мұқият қаралып, заң аясында шешу жолдары қарастырылуда.
Облыс әкімінің жеке қабылдауының қорытындысымен түзілген хаттамалық тапсырмалардың орындалу барысы қатаң бақылауда. Жауапты мекемелерге берілген 366 тапсырманың 355 тапсырмасы орындалған болса, қалған тапсырмалар орындалу барысында. Сондай-ақ, облыс әкімінің орынбасарларының қабылдау қорытындысымен 249 тапсырма беріліп, орындауға жолданған. Жеке қабылдаулар алдағы уақытта да жалғасады.
Қорытындылай келе, азаматтарды жеке қабылдау әлеуметтік мәселелерді шешудің ең тиімді және адамдарға қолжетімді әдістерінің бірі болып табылады. Мемлекеттік органдардың осындай жұмыс тәжірибесі халыққа сенім сыйлайды және қоғамдағы әлеуметтік тұрақтылықты қамтамасыз етеді.