Түркістан облысында халықтың күнделікті тұтынатын әлеуметтік маңызы бар азық-түлік тауарларының бағасын тұрақты деңгейде ұстап тұру бағытындағы кешенді шаралар жүйелі түрде жүзеге асырылып келеді. Өңірде баға өсімін тежеу, ішкі нарықты отандық өніммен қамту және тұрғындардың сатып алу қабілетін сақтау – облыс әкімдігі жұмысының басым бағыттарының бірі болып отыр.
2025 жылдың қорытындысы бойынша Түркістан облысында әлеуметтік маңызы бар азық-түлік тауарларының баға индексі 107,2 пайызды құрады. Бұл көрсеткіш өңірдің республика көлемінде екінші орында тұрғанын көрсетіп, жүргізіліп жатқан баға тұрақтандыру саясатының тиімділігін айқындайды.
Баға тұрақтылығын сақтау мәселесі арнайы жиында қаралды
Аталған бағыттағы жұмыстар Түркістан облысы әкімінің орынбасары Қанат Қайыпбектің төрағалығымен өткен арнайы жиында жан-жақты талқыланды. Жиын барысында өңірдегі баға тұрақтылығын қамтамасыз ету, ауыл шаруашылығы өнімдерін өндірушілермен тікелей байланыс орнату, жәрмеңкелер өткізу, сондай-ақ әлеуметтік дүкендер мен сауда нүктелерінің жұмысын тиімді ұйымдастыру мәселелері кеңінен қарастырылды.
Жиынға жауапты басқарма басшылары, аудан және қала әкімдіктерінің өкілдері қатысып, атқарылып жатқан жұмыстар мен алдағы жоспарлар бойынша есеп берді.
Бағаның негізсіз өсуіне жол бермеу – басты міндет
Облыс әкімінің орынбасары Қанат Қайыпбек әлеуметтік маңызы бар азық-түлік тауарларының бағасын бақылауда ұстау – халықтың әлеуметтік әл-ауқатына тікелей әсер ететін маңызды мәселе екенін атап өтті.
– Халықтың күнделікті тұтынатын негізгі азық-түлік тауарларының бағасын тұрақты бақылауда ұстау – біздің басты назарымызда. Әлеуметтік маңызы бар өнімдердің қорын жеткілікті деңгейде сақтау, арнайы сауда нүктелерінің санын көбейту және өнімді тікелей өндірушіден тұтынушыға жеткізу тетіктерін кеңейту қажет. Бұл бағыттағы мониторинг жұмыстарын күшейтіп, нақты шаралар қабылдаңыздар, – деді Қанат Қайыпбек.
Сондай-ақ ол бағаның негізсіз өсуіне жол берген кәсіпкерлерге қатысты заң аясында қатаң шаралар қолдану қажеттігін атап өтті.
Тұрақтандыру қоры – бағаны тежеудің негізгі құралы
Жиында Түркістан облыстық кәсіпкерлік және сауда басқармасының басшысы Нұржігіт Мырзахметов атқарылып жатқан жұмыстар туралы баяндама жасады. Оның айтуынша, қазіргі таңда басқарма «Түркістан» әлеуметтік-кәсіпкерлік корпорациясы» АҚ-ның Азық-түлікті тұрақтандыру қоры департаментімен бірлесе әлеуметтік маңызы бар азық-түлік бағасын тұрақтандыру бағытында жүйелі жұмыс жүргізуде.
Бүгінде тұрақтандыру қорында 22 мың тонна азық-түлік өнімі сақтаулы. Қажеттілігіне қарай бұл өнімдер кезең-кезеңімен нарыққа шығарылып, бағаның күрт өсуіне жол бермеу шаралары қабылданып отыр.
Сонымен қатар маусымаралық кезеңде, әсіресе қыс айларында көкөніс өнімдерінің бағасын тұрақтандыру мақсатында 12 340 тонна өнімге форвардтық келісімшарттар жасалған. Аталған өнімдер желтоқсан айынан бастап ішкі нарыққа шығарылып, баға өсімін тежеуге мүмкіндік беруде.
Әлеуметтік маңызы бар тауарлар тізімі кеңейтілді
2025 жылдан бастап өңірде әлеуметтік маңызы бар азық-түлік тауарларының тізімі 19-дан 31 атауға дейін ұлғайтылды. Бұл – халықтың негізгі тұтынатын өнімдеріне мемлекеттік бақылауды күшейтуге бағытталған маңызды қадам.
Өңір тұрғындарын қолжетімді бағадағы азық-түлікпен қамтамасыз ету мақсатында облыс көлемінде жәрмеңкелер тұрақты түрде өткізіліп келеді. Жыл басынан бері 491 жәрмеңке ұйымдастырылып, онда 10 мың тоннадан астам өнім нарықтық бағадан төмен бағамен сатылды.
Әлеуметтік дүкендер желісі кеңеюде
Қазіргі таңда Түркістан облысында 40 заманауи әлеуметтік дүкен тұрақты жұмыс істеп тұр. Бұл дүкендерде әлеуметтік маңызы бар азық-түлік өнімдері нарықтық бағадан 30–40 пайызға төмен бағамен ұсынылады.
Сонымен қатар облыс аумағындағы 50-ден астам ірі сауда орындарында әлеуметтік бұрыштар ашылып, онда да арзандатылған азық-түлік тауарлары сатылуда. Бұл тұрғындар үшін қолайлы әрі тиімді сауда алаңдарына айналып отыр.
Мониторинг пен бақылау күшейтілді
Бағаның негізсіз өсуін болдырмау мақсатында облыста 20 жұмыс тобы тұрақты түрде мониторинг жүргізуде. Соңғы екі айдың ішінде әлеуметтік маңызы бар азық-түлік бағасын негізсіз көтерген сауда нүктелеріне қатысты 74 әкімшілік шара қолданылып, жалпы сомасы 481 030 теңге айыппұл салынды.
Бұл шаралар кәсіпкерлерді заң талаптарын сақтауға және баға тұрақтылығын қамтамасыз етуге бағытталған.
Жалпы алғанда, Түркістан облысында әлеуметтік маңызы бар азық-түлік тауарларының бағасын тұрақтандыру бағытындағы жұмыстар кешенді әрі жүйелі түрде жүзеге асырылуда. Тұрақтандыру қорының тиімді жұмысы, әлеуметтік дүкендер мен жәрмеңкелердің көбеюі, сондай-ақ қатаң мониторинг нәтижесінде өңір республика бойынша алдыңғы қатардан көрініп отыр.
Алдағы уақытта да бұл бағыттағы жұмыстар жалғасын тауып, бағаның негізсіз өсуіне жол бермеу, халықты қолжетімді әрі сапалы азық-түлікпен қамтамасыз ету басты міндет ретінде сақталатын болады.