Түркістан облысында білім мен инновацияны ұштастырған дарынды жастардың жетістіктері халықаралық деңгейде танылып келеді. Соның айқын дәлелі ретінде Төлеби ауданындағы мамандандырылған мектеп-интернатының «TOLEBI DARYN» робототехника командасы АҚШ-тың Хьюстон қаласында өтетін беделді «FIRST Championship» әлемдік жарысына жолдама жеңіп алды.
Осыған орай, аудан әкімі Еркеғали Әлімқұлов халықаралық додаға қатысқалы отырған оқушылармен арнайы кездесіп, олардың жетістіктерін жоғары бағалады. Кездесу барысында аудан басшысы жас өнертапқыштардың еңбегі, ізденісі және технологиялық бағыттағы табыстары аудан ғана емес, бүкіл еліміз үшін зор мақтаныш екенін атап өтті.
– Сіздердің жетістіктеріңіз – білімге деген құштарлықтың, табандылық пен еңбекқорлықтың нәтижесі. АҚШ-та өтетін әлемдік деңгейдегі додада ел намысын абыроймен қорғайсыздар деп сенеміз. Бұл – үлкен жауапкершілік әрі үлкен мүмкіндік. Баршаңызға сәттілік тілеймін, – деді аудан әкімі.
Кездесу барысында Еркеғали Әлімқұлов дарынды оқушыларға Түркістан облысының әкімі Нұралхан Көшеровтің «Алғыс хатын» табыстап, жас буынға көрсетілген қолдаудың ерекше мәнге ие екенін жеткізді. Сонымен қатар ол білімді ұрпақ тәрбиелеуге үлес қосқан ұстаздар мен ата-аналарға да ризашылығын білдірді.
«TOLEBI DARYN» командасы соңғы жылдары робототехника мен инженерлік инновациялар саласында айтарлықтай жетістіктерге жетіп, еліміздегі үздік жас техникалық ұжымдардың бірі ретінде танылып отыр. Команда «CENTRAL ASIA FIRST Championship 2026» жарысында жоғары нәтижелер көрсетіп, екі бірдей ірі марапат иеленген.
Аталған байқаудағы табысты өнерінің нәтижесінде «TOLEBI DARYN» командасы абсолютті чемпион атанып, 2026 жылғы 29 сәуір – 2 мамыр аралығында АҚШ-тың Хьюстон қаласында өтетін әлемдік «FIRST Championship» жарысына Қазақстан атынан қатысу құқығына ие болды.
Команданың жетекшілері мен ұстаздарының айтуынша, оқушылар бұл жетістікке ұзақ әрі жүйелі дайындықтың арқасында қол жеткізген. Жобалау, бағдарламалау, инженерлік шешімдер әзірлеу және робот құрастыру бағыттарында терең білім мен тәжірибе жинақтаған оқушылар халықаралық деңгейде бәсекеге қабілетті екенін дәлелдеп отыр.
Аудандық білім беру саласының өкілдері бұл жетістікті Төлеби өңіріндегі техникалық білім берудің жаңа деңгейге көтерілгенінің айқын көрінісі ретінде бағалап отыр. Робототехника саласына қызығушылық танытқан жастар санының артуы да өңірде инновациялық білім берудің дамып келе жатқанын көрсетеді.
Алдағы әлемдік жарыста «TOLEBI DARYN» командасы тек ауданның емес, тұтас Қазақстанның намысын қорғайтын болады. Жас өнертапқыштарға артылған үміт жоғары, ал олардың халықаралық аренадағы өнері елдің техникалық білім саласындағы әлеуетін танытатын маңызды көрсеткіш болмақ.