Бүгінгі қоғамда құқықтық сауатты, қаржыны тиімді басқара алатын әрі жеке жауапкершілігі жоғары азамат қалыптастыру – стратегиялық маңызы бар міндеттердің бірі. Себебі қаржылық және құқықтық білімнің жеткіліксіздігі азаматтардың әлеуметтік-экономикалық осалдығына тікелей әсер етеді. Осыған орай, бүгін Мақтаарал ауданында тұрғындарға арналған қаржылық сауаттылық пен құқықтық қолдау көрсетуге бағытталған семинар-тренинг ұйымдастырылды.
Іс-шара Мемлекет басшысы Қасым-Жомарт Тоқаевтың Жолдауында айтылған «Заң үстемдігі қамтамасыз етілмесе, азаматтардың қауіпсіздігіне кепілдік берілмейді, ал онсыз әлеуметтік-экономикалық даму мүмкін емес» деген қағиданы негізге ала отырып өткізілді. Семинарға арнайы шақырылған тәжірибелі мамандар – «Қарызсыз қоғам» жобасының Түркістан облысы бойынша үйлестірушісі, заңгер Жандос Әзімбай, «Бәйтерек» жастар ұйымы қоғамдық бірлестігінің төрағасы, заңгер-кеңесші Ролан Қонысбеков және PhD доктор, доцент, психолог Салтанат Асанова қатысып, тұрғындарға практикалық маңызы бар кеңестер ұсынды. Кездесу барысында азаматтарға қаржылық мәселелерді басқару, банк шоттарын бұғаттан босату жолдары, қарыздық жүктемені азайту тәсілдері, сондай-ақ құқықтық көмек алу тетіктері кеңінен түсіндірілді. Әсіресе, күнделікті өмірде жиі кездесетін қаржылық қиындықтарды шешудің нақты алгоритмдері ұсынылды. «Қаржылық сауаттылық пен құқықтық білім – әрбір азаматтың қауіпсіздігі мен әл-ауқатының негізгі кепілі. Біз тұрғындарға өзекті мәселелерді шешуде нақты көмек көрсетуге әрдайым дайынбыз», – деді Жандос Әзімбай. Іс-шара соңында қатысушылар өздерін толғандырған сұрақтарын қойып, алаяқтық әрекеттерден сақтану, несие рәсімдеу кезінде назар аударатын жайттар және құқықтық көмекке жүгіну жолдары бойынша тегін кәсіби кеңестер алды. Аталған семинар – тұрғындардың құқықтық мәдениетін арттыруға және қаржылық тұрақтылығын нығайтуға бағытталған маңызды қадамдардың бірі болды.