Түркістан облысында өңірдің әлеуметтік-экономикалық дамуын жеделдетуге бағытталған инвестиция тарту жұмыстары жүйелі түрде жүзеге асырылып келеді. Өңір басшысы Нұралхан Көшеровтің тапсырмасына сәйкес, 2025 жылы инвестициялық ахуалды жақсарту, өндіріс көлемін арттыру және жаңа жұмыс орындарын құру басты басымдықтардың бірі ретінде айқындалды.
Нәтижесінде, 2025 жылдың 11 айының қорытындысымен облыс экономикасының негізгі капиталына 1,4 трлн теңге көлемінде инвестиция бағытталып, өткен жылдың сәйкес кезеңімен салыстырғанда 123 пайыздық өсім қамтамасыз етілді. Бұл көрсеткіш жылдық жоспардың мерзімінен бұрын орындалғанын көрсетеді және өңірдің инвестициялық тартымдылығының артып келе жатқанын айғақтайды.
Биыл облыс аумағында жалпы құны жоғары 58 инвестициялық жобаны іске асыру жоспарланған. Аталған жобалар толық жүзеге асырылған жағдайда 8 190 жаңа жұмыс орнын ашу көзделіп отыр. Қазіргі таңда жоспарланған жобалардың 44-і іске қосылып, нәтижесінде 6 637 тұрғын тұрақты жұмыспен қамтылды. Бұл өз кезегінде халықтың табысын арттырып, әлеуметтік тұрақтылықты қамтамасыз етуге оң әсерін тигізуде.
Өңір экономикасының негізгі көрсеткіштерінің бірі саналатын сауда саласында да айтарлықтай өсім байқалады. 11 айда сауда көлемі 787,9 млрд теңгені құрап, өсім қарқыны 145,9 пайызға жетті. Аталған өсімнің негізгі үлесі бөлшек сауда саласына тиесілі болып, оның жалпы көлемдегі үлесі 54 пайызды немесе 426,3 млрд теңгені құрады. Бұл тұрғындардың сатып алу қабілетінің артқанын және ішкі нарықтағы белсенділіктің жоғары екенін көрсетеді.
Сонымен қатар, көлік және қоймалау қызметтері саласында да тұрақты даму үрдісі қалыптасқан. Аталған саладағы қызмет көлемі 491,6 млрд теңгеге жетіп, өсім 125,7 пайызды құрады. Бұл жоспарланған 110,1 пайыздық көрсеткіштен айтарлықтай жоғары. Жыл қорытындысы бойынша жолаушылар тасымалы мен жүк айналымының артуы есебінен өсім деңгейін 126 пайызға жеткізу жоспарланып отыр.
Байланыс қызметтері саласында да оң динамика сақталуда. 11 айдың қорытындысымен байланыс қызметінің көлемі 10,9 млрд теңгені құрап, өсім 110,9 пайызға жетті. Бұл көрсеткіш жоспарланған 109,6 пайыздан жоғары болып отыр. Жыл соңына дейін аталған саладағы жалпы өсімді 111,5 пайызға жеткізу көзделуде.
Жалпы алғанда, Түркістан облысында жүргізіліп жатқан жүйелі жұмыс пен тиімді басқару шешімдерінің нәтижесінде экономиканың негізгі салаларында тұрақты өсім қамтамасыз етіліп отыр. Инвестиция көлемінің артуы, жаңа өндіріс орындарының ашылуы және жұмыс орындарының көбеюі өңірдің әлеуметтік-экономикалық дамуына серпін беріп, халықтың әл-ауқатын арттыруға негіз болуда.